Panchpargania Karak Ker 1 Ta Best Jankari

Panchpargania Karak :- जोहार संगी-साथी, जदि तहरे पंचपरगनिया भासा केर पढ़ाइ कराला चाहे जे.एस.एस.सी. चाहे JPSC चाहे झारखंड केर कन’ अइन प्रतियोगिता परीक्षा केर तेआरि कराला त हामरेक Panchpargania Karak जरूर पढ़ा । इटाएँ Panchpargania Karak केर जानकारी बहुत सुंदर भाभे देल जातेहे। जोहार लेगे।

Table of Contents

Panchpargania Karak :- पंचपरगनिया कारक केर परिभासा

कारक केर परिभासा केर उपरे बिचार करल जाए त’ कारक असन अनब’ए तत् हेके जेटा संइगा चाहे सरब’नाम संग जुइड़ कहन संइगा चाहे सरब’नाम केर, बाइक केर अइन’ पद (बिसेस क’इर कहन किरिआ) संग संबंध इस्थापित करेला ।

संइगा (चाहे सरब’नाम) केर जन रूप टाले अकर संबंध बाइक केर दसर सब्दक संग ज’ड़ाएला, उ रूप टाके कारक कहल जाएला ।
- कामता प्रसाद गुरू

जेसन – सुमित रगि के डाकटर संग देखाएक खातिर मटरगाड़ी मेंहेन लेइग आहे । इ बाइक टा मेंहेन सुमित ‘‘रगि के’’ ‘‘डाकटर संग’’ ‘‘देखाएक खातिर’’ ‘‘मटर गाड़ी मेंहेन’’ संइगा केर रूपांतर हेके, जेकर दाराएँ इ संइगा गिलाक आपस मेंहेन संबंध आर लेइग आहे किरिआक संग संबंध इस्थापित हए आहे । इ रकम ‘‘क्रियान्वयि कारकम’’ इआनि किरिआ केर सिधि हएक मेंहेन जे मदद करेला अके कारक कहल जाएला ।

इन्हें भी पढ़ें :-

Panchpargania Karak :- कारक केर भेद

पंचपरगनिया मेंहेन आठ कारक केर बेब’हार करल जाएला । इ कारक गिलाक संग हेंठे देल परसरग’ केर बेब’हार करल जाएला –

कारक	परसरग’
करता (कर्त्ता )	———-
करम’ (कर्म)	के
करन (करण)	ए, संग, दारा, ले, माहान/मेंहेन
समपरदान (सम्प्रदान)	के, खातिर, तेहें
आपादान	ले, लेक
संबंध	क, कर, केर
अधिकरन (अधिकरण)	ए, माहान/मेंहेन, उपर
संब’धन	ए, रे, हो, हे, आरे, एग’, एल’, एरे ।

Panchpargania Karak

करता कारक :-

करता केर अरथ’ हएला जे काम कर’इआ हेके । जे काम (किरिआ) करेला, अके किरिआ केर करता कहल जाएला । पंचपरगनिया मेंहेन करता (कर्ता ) कारक केर संग कन’ परसरग’ केर बेब’हार नि करल जाएला । जेसन –

राम पढ़लक । मोहन खालक । बिनय नाचलक । सीता खाइ । एमाइन ।

करम’ कारक :-

जेकर/ जेटाक उपर करताक किरिआ केर फल पड़ेला चाहे किरिआ ले परभाबित हउअ’इआ बस्तु के करम’ कारक कहल जाएला, पंचपरगनिया करम’ कारक केर परसरग’ ‘‘ के ’’ हएला, जेसन –

बाप बेटा के मिठाइ देलक । माएँ बेटा के दुध पिआलक । राम राबन के मारलक । सुमित संदीप के पिटलक । सुकुमार क’नेआ के देखलक । मएँ एकटा क’नेआ के देखलँ । मंगरू गरू टाके चारातेहे । घलटु गाइ टाके दुह’तेहे ।

करन कारक :-

जेटा किरिआ करेक मेंहेन साधन केर रूपे काम आएला चाहे जेटाक दाराएँ काम टा सिधि हएला, सेटाके करन कारक कहल जाएला । पंचपरगनिया करन कारक केर परसरग’ ए, संग, दाराएँ, माहान/मेंहेन आर ले हएला । जेसन –

सुमित गाइ टाके ड’राएँ बांधलक । बिनिता अकर साइकिल मेंहेन आलक । बिसु आपन खेत टाके मसिनेक दाराएँ पाटालक । मछिन केर माएँ डांग ले साग पाड़लक ।

इन्हें भी देखें :-

Panchpargania Lok Geet Me Alankar Ki 1 Best Jankari

Panchpargania Ling Aar Bachan Ker 1 Ta Best Jankari

समपरदान कारक :-

जेकर तेहें कन’ काम करल जाएला चाहे जेके कन’ देल जाए, उटाके समपरदान कारक कहल जाएला । पंचपरगनिया करन कारक केर परसरग’ खातिर, के आर तेहें हेके । जेसन –

माएँ, छुआक तेहें भात रांधलक । परभासा आपन बेटाक तेहें झुला किनलक । रामु अकर छुआक खातिर कामाएला । सीमा, निमा के किताब देलक ।

आपादान कारक :-

जाहाँ कन’ चिज केर अलग ह’एक पाता चलेला, ताहाँ आपादान कारक ह’एला । अलगाउ ले आर’ तफाइत तुलना, सुरू करेक एमाइन केर’ ब’धक के आपादान कारक कहल जाएला । आपादान कारक केर परसरग’ ले आर लेक हएला । जेसन –

गाछ ले/लेक पात गिरलक । राम ले/लेक लखन छटे हेके । राम घर ले/लेक आतेहे । छाइन ले लउआ टा गिरलक । मएँ तर ले बड़े हेकं ।

इन्हे भी देखें :-

संबंध कारक –

जन संइगा चाहे सरब’नाम ले कन’ दसरा सब्द’ केर संबंध जानाएला त’ उके संबंध कारक कहल जाएला । पंचपरगनिया मेंहेन संबंध कारक केर परसरग’ क, कर, केर हएला । जेसन –

बाबुक झुला टा लाल आहे । सहन केर छागेइर टा कारिआ आहे । बुधनी कर लक (भातार) टा मरलक । स’ना केर दाम बाढ़लक । उकर माएँ हिंदे गेलक ।

‘‘बाबुक झुला’’ मेंहेन झुला केर संबंध ‘‘बाब’ु’ संग आहे इ रकम ‘‘बाबुक’’ संबंध कारक हेके । एहे रकमे ‘‘छागेइर’’ केर संबंध ‘‘सहन’’ संग आहे, ‘‘लक’’ (भातार) केर संबंध ‘‘बुधनी’’ संग आहे, ‘‘दाम’’ केर संबंध ‘‘स’ना’’ संग आर ‘‘माएँ’’ केर संबंध ‘‘उ’’ संग आहे, इ भाभे ‘‘सहन केर’’ ‘‘बुधनी कर’’ ‘‘स’ना केर’’ आर ‘‘उकर’’ संबंध कारक हेके ।

अधिकरन कारक :-

ज’न टाले किरिआक आधार केर जानकारि हएला, उके अधिकरन कारक कहल जाएला । एआनि संइगा केर जन रूप टाले किरिआ काहाँ हएला, सेटाक गेआन हएला उटाके अधिकरन कारक कहल जाएला । अधिकरन कारक केर परसरग’ पंचपरगनिया मेंहेन – ए, माहान/मेंहेन आर उपर हएला । जेसन –

राम घरे पढ़’ तेहे । जनक छत उपरे खेल’ तेहे । बारातिआ सउब छत उपरे खा तहएँ । कंकइ टा दिरखा माहान आहे । गाछ उपरे चरइ बसल आहे ।

संब’धन कारक :-

संइगा केर जन रूप टा ले केकउ डाकेक चाहे चेतकारि करेक एमाइन केर भाउ पाता चलेला उटाके संब’धन कारक कहल जाएला । संब’धन कारक केर संग पंचपरगनिया मेंहन ए, रे, हो, हे, आरे, एग’, एल’, एरे, एह’, एइ एमाइन परसरग’ केर बेब’हार करल जाएला । जेसन –

ए बाबु ! हिंदे काहाँ जाबे ?
अए रे ! हिंदे काहाँ जातिहिस ?
ए हो ! रहा संगेइ जाप ।
हे भगमान ! दएआ कर ।
आरे भाइ ! काहाँ जाबे ।
एग’ ! काहाँ जातिहिस ।
एल’ बाछा ! मराले मके । एइ ! सुन न’ ।

सारांश :-

इ रकम पंचपरगनिया कारक केर बेब’हार पंचपरगनिया भासा मेंहेन आपन धचर कर अनुजाइ करल जाएला। पंचपरगनिया मेंहेन करता कारक केर कन’ परसरग’ केर बेब’हार नि करल जाएला।