Panchpargania Abbay :- जोहार संगी-साथी, जदि तहरे पंचपरगनिया भासा केर पढ़ाइ कराला चाहे जे.एस.एस.सी. चाहे JPSC चाहे झारखंड केर कन’ अइन प्रतियोगिता परीक्षा केर तेआरि कराला त हामरेक Panchpargania Abbay जरूर पढ़ा । इटाएँ Panchpargania Abbay केर जानकारी बहुत सुंदर भाभे देल जातेहे। जोहार लेगे।
Table of Contents
Panchpargania Abbay :- अब्ब’ए केर अरथ’
अब्ब’ए केर साब्दिक अरथ’ हेके जेटा ब’ए नि ह’ए । एआनि ज’न सब्द’ केर रूपांतर नि ह’एला । उ आपन मुल रूप मेंहनेइ रहेला उटाके अब्ब’ए कहल जाएला ।
Panchpargania Abbay :- अब्ब’ए केर परिभासा
कन’ भि भासा केर असन सब्द’ अब्ब’ए हेके, जेगिलाक रूप लिंग, बचन, कारक, पुरूस एमाइन केर कार’ने कन’ बिकार नि ह’एला । एसन सब्द’ गिला सारातखन आपन मुल रूप मेंहनेइ बनल रहेला । अब्ब’ए के अबिकारि सब्दउ कहल जाएला ।
‘‘बाइके आल जन सब्द’ गिलाक रूप लिंग, बचन, आर कारक केर अनुजाइ कन’ परिबरतन नि ह’एला, उके अब्ब’ए कहल जाएला । ’’
प्रो. राम खेलावन राय
एआनि अब्ब’ए असन बेआकर’निक सब्दाउलि हेके जेटा बाइक मेंहेन बेब’हार ह’लउ अइन’ सब्दक रकम पद रचना मेंहेन कन’ संरचनात्मक परिबरतन नाइ ह’एला आर मुल संरचना मेंहनेइ किबल बेब’हार ह’एला ।
Panchpargania Abbay :- अब्ब’ए केर भेद
अब्ब’ए केर चाइर टा भेद आहे –
- किरिआ – बिसेसन
- संबंध ब’धक
- समुच’ए ब’धक
- बिस्म’एआदि ब’धक
किरिआ-बिसेसन अब्ब’ए :-
जन अबिकारि अब्ब’ए सब्द’ ले किरिआ केर कन’ बिसेसता जानल जाएला, उटाके किरिआ बिसेसन अब्ब’ए कहल जाएला । किरिआ बिसेसन असन पद हेके, जेटा काल, इस्थान, रिति, आर परिमान संबंधी बिसेसता केर ब’ध कराएला आर किरिआ के जानाएला । जेसन –
- डमन दम आँटे कुदलक ।
- गरू गाड़िक चाका टा धिरे – धिरे गुड़क’ तेहे ।
- आइज हाउआ आँटे चल’ तेहे ।
- आइज दमे रउद देतेहे ।
- आइज दमे पानि कर’तेहे ।
अरथ’ केर अनुजाइ किरिआ बिसेसन चाइर रकमेक ह’एला :-
क. इस्थानबाचक :-
जन सब्द’ ले किरिआ केर ह’एक जाएगाक/इस्थान केर ब’ध ह’ए अके इस्थान बाचक किरिआ बिसेसन अब्ब’ए कहल जाएला । जेसन – हिंआ, हुंआँ, उपर, भितर, बाहिर, भितर, जाहाँ, इधार, उधार, नेगा, दाहिना, आस-पास, इठिन, उठिन, हाउठिन एमाइन ।
- कुकुर टा हिंआँ का भुक’तेहे ।
- सिआड़ टा हुंआँ का भुक’तेहे ।
- मदना उठिन गिरलक ।
ख. कालबाचक किरिआ बिसेसन :-
जन सब्द’ ले किरिआ चाहे काम केर ह’एक सम’इ केर पाता चलेला । जेसन – एखन, कखन, एबार, आरब’छर, आइज, काइल, सारातखन, तुरूत, राइतभइर, र’जे, ढेइरधं, प’उरसाल एमाइन ।
- मदन दिनभइर हार ज’तलक ।
- सारातखन पढे़क ना लागे ।
- तके ढेइरधं देइख आहं ।
- खेदुआ केर काइल परिछा आहे ।
- सिमा एखन पढ़’ तेहे ।
ग. परिमानबाचक किरिआ बिसेसन :-
जन सब्द’ ले किरिआ केर परिमान संबंधि बिसेसता जानाएला । जेसन – बेसि, कम, बड़े, अनठेकान, दमतक, तनिक, एकठ’पा, थड़ेक-आधेक, किछु, एतना, अतना एमाइन ।
- राइते तनिक टाइ खाना खाएक चाहि ।
- खेड़िआ अनठेकान चुड़पेला ।
- स’मरा बड़े खेत के ज’तेला ।
- सिमा, निमा के दमतक पिटलक ।
घ. रितिबाचक किरिआ बिसेसन :-
जन सब्द’ ले किरिआ केर पुरा ह’एक रिति चाहे ढंग केर पाता चलेला । जेसन – जेसन, तेसन, एकसंगे, फाटाफ’इट, चाँड़े, धिरे-धिरे, आँटे-आँटे, आचाकाएँ, अहेतेहें, रकम, अब’इस’ ।
- गाड़िक चाक टा आँटे-आँटे गुड़क’तेहे ।
- बुढ़ा ल’क टा साइकिल धिरे-धिरे चालातेहे ।
- सिमा आचाकाहिं कुआएँ गिरलक ।
- मएँ त’हरेक कामटा अब’इस’ करम ।
- मनिस, जितु रकम खेलेला ।
संबंध ब’धक अब्ब’ए :-
असन अब्ब’ए जेटा बाइक मेंहेन कन’ संइगा सब्दक बादे ज’ड़ाए कहन अकर संबंध बाइक केर द’सर सब्दक संग जानाएला उटाके संबंध ब’धक अब्ब’ए कहल जाएला । जेसन – भइर, तक, बिना, आघु, पास, धुर, पहिल, बाद, लगभग, मातर’ कारन, जाला, मदद, चलते, आलाउआ, बदल एमाइन ।
- संदीप राइत भर कांदत रहलक ।
- सुरज राइत भर पढ़त रहलक ।
- मएँ घर तक जाए रहं ।
- उ मर घर पासे रहेला ।
- मानुस पानिक बिना जिअँत नि रहे पारे ।
- मके त’र कार’ने जाए ह’लक ।
- बुुंडु केर बादे राँचि आहे ।
समुच’ए ब’धक :-
जन सब्द’ टा एक बाइक चाहे सब्द’ केर संबंध दसर बाइक चाहे सब्द’ संग जानाएला । उटाके समुच’ए ब’धक अब्ब’ए कहल जाएला ।
- सुमिता हाँसेला आर संदीप काँदेला ।
- सिमा जाइ हले मंएअ’ जाम ।
- तएँ पढ़िं चाहे खाइं ।
- निमा आलक किंतु मर संग भेंट नि करलक ।
- तएँ जे.पी.एस.सी. केर पढ़ाइ कर चाले जे.एस.एस.सी. केर पढ़ाइ कर ।
- मएँ ढेइरधं बुझालं हलउ मर काथा नि बुझलक ।
संबंध ब’धक मेंहेन अब्ब’ए ले पहिलुक पद/डांड़ि चाहे बादेक पद/डांड़ि अपुरन’ अरथ’ आउला रहेला किंतु समुच’ए ब’धक मेंहेन अब्ब’ए केर पहिलुक पद/डांड़ि चाहे बादेक पद/डांड़ि पुरन’ अरथ’ आउला रहेला ।
समुच’ए ब’धक अब्ब’ए दुइ रकमेक आहे :-
समानअधिकरन आर बेआधिकरन ।
समानअधिकरन :-
एकर चाइर टा उपभेद आहे :-
क. संज’जक :-
जन अब्ब’ए टा दुइ चाहे दुइ ले बेसि सब्द’ चाहे बाइक के ज’ड़ेला उटाके संज’जक कहल जाएला । जेसन – आर, एबंग’ एमाइन ।
- निमा आर सिमा दुइअ बहिन – बहिन हेकएँ ।
- निमा, सिमा एबंग’ बिबेक पढ़े जाए आहएँ ।
ख. बिभाजक :-
इ अब्ब’ए टाएँ दुइ चाहे दुइ ले बेसि बाइक चाहे सब्द’ मेंहेन कन’ एकटा के आपुस चाहे दुइअ के छाइड़ देल जाएला । जेसन –
- जे.पी.एस.सी. मेंहेन पंचपरगनिया राखिं नितर कुड़मालि राखिं ।
- किताब टाके बिनिता फाइड़ ह’इ चाहे बिबेक फाइड़ ह’इ ।
- तेलखेइर करे मर माएँ जाइ चाहे/चाले मर भउजि जाइ ।
- तेलखेइर करे ना मर माएँ जाइ ना मर भउजि जाइ ।
- मेला देखे जाबा न धान पिटबा ।
एसन अब्ब’ए गिला – ना, एआ, चाहे, किंबा, नितर/नाइतर, आर ना, न हेके ।
ग. बिर’धदरसक :-
इ अब्ब’ए टाएँ दुइटा बाइक मेंहेन बिर’ध देखाएला आर कन’ एकटा के आपुस चाहे छाड़ेक कहेला । जेसन –
- जगदीस आलक किंतु माहाबीर नि आलक ।
- मएँ किबल पढ़ुआ ना लागं बरंग’ खिलाड़िअ हेकं ।
- तएँ एसन करम क’हिसला किंबा एसन ना कर ।
- तएँ साहेब ब’नम क’हिसला किंतु पढ़ेक ठेकान नेखे ।
एसन अब्ब’ए गिला – किंतु, किंबा, लेकिन, बल्कि बरंग’ एमाइन हेके ।
घ. परिनाम दरसक :-
इ अब्ब’ए टाएँ पाता चलेला कि आघुक बाइक टाक अरथ’ पेछुक बाइक केर अरथक परिनाम हेके । जेसन – कुनाल केर माएँ कुनाल के दम पिटलक (कारन) अहेतेहें कुनाल पारालक (परिनाम) । हिंआ कुनाल केर पाराएक कारन अकर माएँक पिटल हेके ।
एसन अब्ब’ए गिला – अहेतेहें, अहेजालाएँ एमाइन हेके ।
बेआधिकरन :-
एकर’ चाइर टा उपभेद आहे –
क. कारन बाचक :-
इ अब्ब’ए टाले सुरू हउअ’इआ बाइक पहिलुक बाइक केर समरथन करेला । जेसन – कुनाल पारालक (परिनाम) काहेकि अकर माएँ अके दमे पिट आहे (समरथन) ।
एसन अब्ब’ए गिला – काहेकि, जे कि एमाइन हेके ।
ख. उदेसबाचक :-
जे, ताकि
- तके मएँ राँची भेजम ताकि तएँ बेस लेखेर पढ़ाइ करबे ।
- का करल जाउक जे इ छुआ टा पढ़ि ।
ग. संकेतबाचक :-
जे…..ते, जदि……….त’ एमाइन ।
- जे पहिल आइ ते पहिल पाइ ।
- जदि सिमा आइ त’ मएअँ जाम ।
घ. सउरूपबाचक :-
कि, जे, एआनि एमाइन ।
- मके एसन लागत रहे कि दुइ थापड़ दे देमु ।
- बात इटा हेके कि मर पास पइसा नेखे ।
बिस्म’एआदि ब’धक :-
जन अब्ब’ए ले हर्स’, स’क, घिरना, आसचरज’ एमाइन केर भाअ जानल जाएला किंतु एकर संबंध बाइक चाहे अकर अइन’ कन’ पद संग नि रहेला, उटाके बिस्म’एआदि ब’धक अब्ब’ए कहल जाएला । पंचपरगनिया बिस्म’एआदि ब’धक अब्ब’ए ले ढेइर रकम केर भाअ जानाल जाएला । जेगिला इ रकम आहे –
हर्स’ ब’धक :-
बाह ! तएँ जे.पी.एस.सी. पास कइर लेले ।
बाह-बा ! तएँ ग’उल माइर देले ।
साबाइस ! त’हरे बहुत बेस काम क’रला ।
आसचरज’ ब’धक :-
अह’ ! काम टा ब’गड़’लक ।
का ! पुरेन केर एकसिडेंट ह’लक ।
तिरस्कार ब’धक :-
छि ! आइज ले एसन काम ना क’रबे ।
धेइत ! एसन काम ना क’रबा ।
छि-छि ! एसन काथा ना क’हबे ।
चुप ! मके रागा क’राले आइग लागाए देम ।
सइकार ब’धक :-
हं ठिक ! काम टाके आघु बाढ़ाउआ ।
आछा ठिक ! मएँ राँची आम ।
बहुत बेस ! इ काम टा ह’ए गेलक ।
संब’धन ब’धक :-
एरे ! सुन त’ ।
एह’ ! हुंदे ना जाउआ ।
एल’ ! तेलखेइर क’रे जाबे न ?
स’क सुचक :-
हाए-हाए ! छुआ टा म’इर गेलक ।
अहरे ! छुआ टा गिर गेलक ।
हाए रे ! फानला एबार म’इर जाइ ।
Panchpargania Abbay सारांश:-
इ रकम पंचपरगनिया मेंहेन आपन पर’किरतिक अनुजाइ अब्ब’ए केर बेब’हार करल जाएला । बास्तब माहने पंचपरगनियाए हिंदी रकम अब्ब’ए केर बेब’हार सतंतर’ रूपे नाइ ह’एला बल्कि कांहु-कांहु सब्द’ केर संगे ज’ड़ाए कहन चाहे तनिक आधेक फेर बदल क’इर कहन बेब’हार करल जाएला । जेसन पास – पासे/पासेइ, बाद – बादे/बादेइ, आंट – आंटे/आंटेइ, धिरे – धिरेइ, बड़े – बाड़का/ब’ड़के एमाइन ।
इन्हें भी पढ़ें :-
पंचपरगनिया सइंगा, सरब”नाम, बिसेसन, धातु ,भासाक तेहें वेयाकरण केर दरकार, अंतस्थ बरन’, पंचपरगनिया लिपि जाला, अब्ब’ए
UGCNET TRL की जानकारी के लिए निचे दिए गए लिंक पर क्लिक करें