Panchpargania Samas Ker 1 Ta Best Jankari

by
Share

Panchpargania Samas :- जोहार संगी-साथी, जदि तहरे पंचपरगनिया भासा केर पढ़ाइ कराला चाहे जे.एस.एस.सी. चाहे JPSC चाहे झारखंड केर कन’ अइन प्रतियोगिता परीक्षा केर तेआरि कराला त हामरेक Panchpargania Samas जरूर पढ़ा । इटाएँ Panchpargania Samas केर जानकारी बहुत सुंदर भाभे देल जातेहे। जोहार लेगे।

20221224 135228
Panchpargania Samas

Panchpargania Samas :- समास केर अरथ’ :-

समास सब्द’ केर अरथ’ हेके – संछेप चाहे छ’टे रूप । एआनि ज’खन दुइ चाहे दुइ ले बेसि सब्द’ मेंइस कहन एकटा नाउआ आर छ’टे सब्द’ बनेला त’ इटाके सामासिक सब्द’ कहल जाएला आर इ दुइ चाहे दुइ ले बेसी सब्दक संज’ग टाके समास कहल जाएला ।

दसर काथाएँ कहल जाए पाराए कि जाहाँ कम ले कम सब्दएँ बेसि ले बेसि अरथ’ जानाल जाए त’ उटाके समास कहल जाएला ।

Panchpargania Samas :- समास केर संबंधे कहनि :-

समास केर संबंध मेंहेन एकटा कहनी इ रकम आहे – एकधं राजा भ’ज केर दरबार मेंहेन एकटा बिदुआन कबि आए र’हे । दरबार केर राजकबि सउब समइ केर कमीक चलते अके आपन बारे संछेप मेंहेन कहे कहलंए – ‘‘ कवे समासे वद’’ एआनि कबि संछेप मेंहेन क’हा । किंतु कबि ‘‘ समासे वद’’ केर अरथ’ बुझलक कि समास कतना आहे आर का हेके ? इमन आसु कबि रहएँ । इमन समास केर चरचा करत के हेंठेक सल’क केर दाराएँ आपन चिन्हाप देलएँ –

द्वन्द्वो द्विगुरपि चाहं मद्गेहे नित्यमव्ययीभावः ।
तत्पुरूष कर्मधारय येनाहं स्याम् बहुब्रीहिः ।

इ सल’क के मतलब हेके – हे माहाराज मंएँ द्वन्द्व (ज’ड़ा) आहं, एआनि मर परिबार मेंहेन मातर’ मंएँ आर मर पत्नि आहि । मंएँ द्विगु एआनि दुइ गाइ आउला हेकं । मर घरे धन केर कमि (अव्ययीभाव) आहे । हे तत्पुरूष (माहामाइन’), त’हरे मके काम (कर्म) धारन कराउआ (धारय), एआनि मर तकलीफ केर दुर करा ताकि मंएँ धनीमान (बहुब्रीहि) बइन जांउका ।

इ सल’क मेंहेन समास केर लगभग सउब भेद केर उलेख ह’ए आहे । किबल न´ समास केर बेब’हार नेखे ।

Panchpargania Samas :- समास केर परिभासा :-

दुइ चाहे दुइ ले बेसि सब्दक आपसे संबंध जानाइआ सब्द’ चाहे परत’ए केर लुकले, उ दुइ चाहे दुइ ले बेसि सब्द’ ले, जे एकटा नाउआ सब्द’ बनेला, उटाके सामासिक सब्द’ कहल जाएला आर उ दुइ चाहे बेसि सब्द’क मेल टाके समास कहल जाएला ।

कामता प्रसाद गुरू

समास केर अरथ’ हेके संछेप । कम ले कम सब्दएँ बेसि ले बेसि अरथ’ बेएक्त’ करना टाइ समास केर मुल काम हेके ।

डाॅ. बासुदेव नंदन प्रसाद

इ रकम समास मेंहेन दुइ चाहे दुइ ले बेसि सब्द’ के सामासिक निअम केर दाराएँ संछेप कइर के छ’टे बनाल जाएला । संस्कृत, जर्मन, हिंदी एमाइन भासा मेंहेन समास केर बेसि बेब’हार देखाएला किंतु पंचपरगनिया मेंहेन एकर बेब’हार बहुत कम मातराएँ देखे पाउआएला आर जाहाँ देखाएला, हुआँ हिंदी भासा केरे निअम लागु करल जाएला ।

20221224 135228 1
Panchpargania Samas

इन्हें भी पढ़ें :-

पंचपरगनिया सइंगा, सरब”नाम, बिसेसन, धातु ,भासाक तेहें वेयाकरण केर दरकार, अंतस्थ बरन’,  पंचपरगनिया लिपि जाला, अब्ब’ए

Panchpargania Samas :- समास केर भेद :-

समास रचना मेंहेन दुइ पद हएला पहिलुक पद के पुरब’ पद आर बादेक पद के उतर पद कहल जाएला आर इ दुइअ ले जे नाउआ पद बनेला उटाके समस्त’ पद कहल जाएला । समस्त’ पद मेंहेन कखन’ पहिलुक पद परधान त’ बादेक पद अपरधारन (गौण) हएला । एहे रकमे कबउ पहिला पद अपरधान त’ दुसरा पद परधान हए जाएला ।

कबउ – कबउ दुइअ पद परधान हए जाएला । त’ कबउ – कबउ कन’ पद परधान नी हएला । चुँकि पंचपरगनिया मेंहेन हिंदी केर अनुकरन करल जाए आहे, इ रकम पद केर परधानताक अनुजाइ समास के हेंठे देल भागे बाँटल जाए आहे –

  •  पहिलुक पद परधान – अब्बइ भाअ समास (अव्ययीभाव समास)
  •  बादेक पद परधान – तत्पुरूस समास, करम’धार’ए समास, दिगु समास
  •  दुइअ पद परधान – दंद समास
  •  दुइअ पद अपरधान – बहुबिरहि समास

इ रकम पंचपरगनिया मेंहेन हिंदी रकमे समास केर छ’टा भेद आहे इटाएँ किछु केर उपभेद’ करल जाए आहे :-

अब्बइ भाअ समास :-

जन समास केर पहिला पद (पूर्व पद) अब्अए आर परधान हएला, उके अब्बइ भाअ समास कहल जाएला । एआनि अब्अए केर मेेल ले बनल सब्द’ के अब्बइ भाअ समास कहल जाएला |

जेसन – निडर, सारातखन, अभाब, अनपढ़, असिछित, केजान, बेकार, बेहेला, हरसाल, बेकाम, बेसुरा र’जदिन, अनुजाइ, हरजाएगा, दिनेदिन, बेलुइर, एकेक, धाड़ा-ध’इड़, हच’-चड़’, राइत’-राइत, धीरे-धीरे, छंद’-रंद’, मनमाना, पेटभइर, इधार-उधार, जखनतड़िक, मांझेमांझ, मनेमन, बारंबार एमाइन ।

तत्पुरूस समास :-

जन समास मेंहेन बाद केर पद परधान रहेला, उटाके तत्पुरूस समास कहल जाएल । इ समास केर पहिला सब्द’ बेसि भाभे संइगा चाहे बिसेसन रहेला, आर बिगर’ह मेंहेन इ सब्दक संग करता (कर्ता) आर संबंधन कारक के छाइड़ कहन बाकि सभे कारक केर बिभक्ति लागेला –

क. करम’ तत्पुरूस समास :-

इटाएँ करम’ कारक केर बिभक्ति के लुकल रहेला । जेसन –

मुँड़काटा – मुँड़ के काट’इआ ।
काठबेचा – काठ के बेच’इआ ।
चरइमार – चरइ के मार’इआ ।

ख. करन तत्पुरूस समास :-

इटाएँ पंचपरगनिया करन कारक केर बिभक्ति ए, संग, दारा, ले, माहान/मेंहेन लुकल रहेला । जेसन –

मनचाहा – मन ले/मेंहेन चाहल ।
माहत’रचल – माहत’ दारा रचल ।
ढेंकिछांटल – ढेंकि ले/माहान/मेंहेन छांटल ।

ग. समपरदान तत्पुरूस समास :-

इटाएँ पंचपरगनिया समपरदान कारक केर बिभक्ति के, खातिर, तेहें लुकल रहेला । जेसन –

हांथघड़ी – हांथक तेहंे घड़ी ।
डहरखरचा – डहरेक तेहें खरचा ।
नाहानघर – नाहाएक तेहें घर ।

घ. आपादान तत्पुरूस समास :-

इटाएँ पंचपरगनिया आपादान कारक केर बिभक्ति चिन्हा – ले, लेक लुकल रहेला । जेसन –

कामचर – काम ले बाँच’इआ ।
पापमुक्त’ – पाप ले मुक्ति ।
धनहिन – धन ले हिन ।

ङ. संबंध तत्पुरूस समास :-

इटाएँ संबंध कारक केर बिभक्ति – क, कर, केर लुकल रहेला । जेसन –

गरूगाड़ि – गरू केर गाड़ि ।
राजाछुआ – राजाक छुआ/राजा केर छुआ ।
प’राधिन – पर (दसर) केर अधीन ।

च. अधिकरन तत्पुरूस समास :-

इटाएँ अधिकरन कारक केर बिभक्ति – ए, माहान/मेंहेन, उपर लुकल रहेला । जेसन –

घरदामाद – घर माहान दामाद ।
घरघुस्टा – घर माहान ढुकल रह’इआ ।
आपबिति – आपन माहान बितल ।

20221224 135228 2
Panchpargania Samas

इन्हें भी पढ़ें :-

करम’धार’ए समास :-

करम’धार’ए समास के समानाधिकरन तत्पुरूस’ कहल जाएला । इटा तत्पुरूस समास केरे भेद हेके । इटाहुँ समस्त’ पद केर बादेक पद परधान हएला आर पहिलुक पद आर बादेक पद मेंहेन उपमान – उपमेए चाहे बिसेसन – बिसेस्अ’ केर संबंध रहेला । जेसन –

हाँड़िमुड़ा – हाँड़ि केर रकम मुड़ ।
बेंगठिगड़ि – बेंगठि केर रकम गड़ ।
लालमाटि – लाल रकम माटि ।

दिगु समास :-

जन समास मेंहेन पहिला पद संइखाबाचक हएला, उके दिगु समास कहल जाएला । दिगु समास करम’धार’ए समास केरे एकटा भेद हेके । जेसन –

पाँचपरगना – पाँच टा परगनाक जड़न/जहड़न ।
चतुरभुज – चाइर भुजा आउला ।
सातबह्नि – सात बह्निक (बहिनेक) जड़ ।
नारता – न’ दिनेक नेग ।
तिनक’निआ – तिन क’ना आउला ।
चाइर क’निआ – चाइर क’ना आउला ।

दंद समास :-

जन समस्त’ पद केर दइअ’ पद परधान हएला, उटाके दंद समास कहल जाएला ।

जेसन – गरू – छागेइर, धरम – करम, रहन – सहन, माँए – बाप, नदि – नाला एमाइन । दंद समास मेंहेन बिगर’ह करले पंचपरगनियाएँ दुइअ पद केर मांझे ‘‘आर’’ जड़ल जाएला ।

बहुबिरहि समास :-

जन समास मेंहेन कन’ पद परधान नाइ ह’एला आर जेटा आपन पद ले भिनु कन’ संइगा केर बिसेसन हएला, उटाके बहुबिरहि समास कहल जाएला । बिदुआन केर अनुजाइ – जे आपन साब्दिक अरथ’ छाइड़ कहन बिसेस अरथ’ जानाएला, एसन सब्द’ के बहुबिरहि समास कहल जाएला । एआनि जन समस्त’ पद मेंहेन कन’ पद परधान नाइ/नि हएला, बल्कि इ दुइअ’ पद मिलकहन कन’ तिसरा पद बाटे संकेत करेला । जेसन –

हाँड़िमुड़ा – हाँड़ि केर रकम मुड़ जेकर ।
ग’जामुहि – ग’जा मुँह आहे जेकर ।
हांथिदांति – हांथि केर जेसन दांत आहे जेकर ।
बांदरमुहा – बांदर रकम मुँह आहे जेकर ।

इन्हें भी पढ़ें :-

एकर अलाउआ पंचपरगनिया मेंहेन नइ समास केर’ जिकिर बिदुआन सउब कर’एँला हालांकि इटा करम’धार’ए समास केरे उपभेद हेके –

नइ समास :-

जन समास केर पहिला पद निसेधबाचक एआनि नाकारात्मक रहेला, उटाके नइ समास कहल जाएला । पंचपरगनिया मेंहेन एसन सब्दक आघुइं बे, अ, आ, आन, अन, न, नि आर ना एमाइन लागल रहेला । जेसन –

अनजान – नि जानल । अनसुना – जेटा नि सुनल आहे ।
अनबन – नि बनेक । बेलुरा – बिना लुइरेक ।
आनगांउ – दसर गांउ । बेठिक – ठिक नाहिं ।
नालाइअक – लाइक केर निहिं ।

Panchpargania Samas
Panchpargania Samas

Panchpargania Samas :- सारांश

इ रकम पंचपरगनिया मेंहेन आपन पर’किरतिक अनुजाइ समास केर बेब’हार करल जाएला । बास्तब माहने पंचपरगनियाए हिंदी केर समास नियम गिलाई बेब’हार ह’एला | पंचपरगनियाए हिंदी केर रकम समासिक सब्दो बेसी नेखे । 

आइज केर जानकारी केसन लागलग जरूर कमेंट करबा। एसने बेस-बेस परीछा उपजगि जानकारी लेएक तेहें हामरेक बेबसाइट टाके रजे भिजिट करबा। एकर अलावा पंचपरगनिया भासा संबंधी केसन जानकारी चाहाला उटाकउ कमेंट केर दाराए बताबा। लेगे सउब के जोहार कर”तिहि।

इन्हें भी पढ़ें :-

पंचपरगनिया सइंगा, सरब”नाम, बिसेसन, धातु ,भासाक तेहें वेयाकरण केर दरकार, अंतस्थ बरन’,  पंचपरगनिया लिपि जाला, अब्ब’ए समास

UGCNET TRL की जानकारी के लिए निचे दिए गए लिंक पर क्लिक करें

ugcnettrl


Share

Leave a Comment