Panchpargania Karam Geete Janjivan Aar Sanskriti Ker 1 Ta Best Jankari

Share

Panchpargania Karam Geete Janjivan Aar Sanskriti :- जोहार संगी-साथी, जदि तहरे पंचपरगनिया भासा केर पढ़ाइ कराला चाहे जे.एस.एस.सी. चाहे JPSC चाहे झारखंड केर कन’ अइन प्रतियोगिता परीक्षा केर तेआरि कराला त हामरेक Panchpargania Karam Geete Janjivan Aar Sanskriti जरूर पढ़ा । इटाएँ Panchpargania Karam Geete Janjivan Aar Sanskriti केर जानकारी बहुत सुंदर भाभे देल जातेहे। जोहार लेगे।

20221222 145910
Panchpargania Karam Geete Janjivan Aar Sanskriti

पंचपरगनिया करम गीते जनजीबन आर संसकिरति|Panchpargania Karam Geete Janjivan Aar Sanskriti

करम केर परब भाइ आर बहिन केर पेरेम केर परब हेके। सेतेहें करम परबेक पहिले परतेक भाइ आपन बहिन के आने खातिर अकर ससुरघर जाएला। आपन भाइ के आउअल देइख के बहिन नइहर आए खातिर बेआकुल हए जाएला। अकर बेआकुलता इ गीत माहान सहजेइ देखे पारी –

“करमेका लह’ लहि, भइआ लेगे आउअल
करू ससुर हामरअ बिदाइ।”

जदि कन’ कारन केकरअ भाइ करम परबे बहिन के आने जाए नि पारलक हले अकर हिरदए माहान केसन मरमांतक बेदना हएला सेटाक बरनन इ गित टाँए आहे –

“कांसी फूल झड़ि गेल, आसा मर टुटि गेल।
काँदि-काँदि छतिआ ध’आए।”

इ भाभे करम गिते एक बाटे भाइ बहिन केर गाढ़अ पेरेम केर उलेख पाउआएला त’ दसर बाटे बहिन केर ससुर घरेक कसट’मए जीबन केर गाथा, नइहर आए केर परबल आसा उतकंठा आर बेआकुल पाउअल जाएला।

पंचपरगनिया छेतर’ खेति किसानी छेतर’ हेके। खेति किसानी माहान बेटी छुआ केर भागिदारी पुरूस लेक बेसि ह’एला। धान केर, कुरथी केर, बुट एमाइन केर क’न बिज टा केसन सेटा इमनेइ चिन्हे पारएँला से तेहें करम परबे बेटिछुआ केरे जाउआ उठाएक परचलन आहे। जाउआ केर अरथ’ ह’एला दाना। जाउआ डालि केर दाराँए उमन परतेक परकार केर बीज के परिछन करएँला।

बिधि-बिधान केर संगे उमन लागातार सात दिन चाहे उकर लेक बेसि दिन तक बिज (दाना) केर परीछन क’रते रहँएला जेेटा बेस जनमेला आर हिस्टअ पुसटअ ह’एला सेइ बिज (बिहीन) टाके चुनाव कइरके राख’एँला। करम परबे जाउआ उठाएक गित केर एहे टाइ मतलब हेके।

“इति-इति जाउआ किआ-किआ जाउआ
जाउआ लाइगल’ भाइ कुरथि का बदरा
सेह’ रे कुरथि एक’ पातके सअ पात।”

एहे रकमे गित धान, बुट, जअ, मड़ुआ एमाइन केर संबंधउ गाउअल जाएला।

जाउआ गित माहान गारामिन कुँआरि छुआ केर भाउक हिरदए, कलपना केर उड़ान आर उद्बेग केर उलेख का र’कम ह’एक चाहि उ तअ मानातेहे कि अकर ननदेसु भाइ आएकहन अके लेजाउक। गीत देखा-

“बाँका रे बाँका कुरथि
भुँजे बइठल छ’टकी ननद।
भुँज’इते भुँज’इते ननद पड़ि जाए
लाजेहि न जाए ससुराइर।
आउ रे आउ ननदेसु भाइ
नन’दि के लेगु ग’हड़ाए।”

20221222 145910 1
Panchpargania Karam Geete Janjivan Aar Sanskriti

क’खन’ त’ भउजाइ केर इरसा भाउना एसन’ बेएक्त’ ह’ए आहे-

“ काहे ल’ ननद छोंड़ि
टाटि क’नाए ठाढ़ ल’
टुपला खँसा देबूँ उधनाँए।
राँध’बुँ दाइल’ – भात
करबूँ पिठा ल’
ठेलकि पाठाबुँ ससुराइर।”

पंचपरगनिया छेतर’ माहान कुँआरि बेटिछुआ केर मन माहान एसन हिंछा र’हेला कि अकर बिहा नइहर लेक बेसि धुरे ना ह’उक, ना ह’ले करम परबे उ आपन ज’ड़ी – ढाँगरी संगि सउब नाच-डेग केर आनंद लेएक लेक बंचित ह’ए जाइ आर अकर हिरदए काँदत र’इ जाइ। इटाक परमान इ गित केर दाराए ह’ए आहे –

“कुरथि फुल कुरथि फुल
फुट सारासाइर गअ
बेटि छुआक धुरे बिहा
काँइदेछे अंतर गअ।”

बिहा ह’ल बादे बेटी छुआ केर मातरितअ केर भाउना खुब परबल ह’एला संतान केर मुख नी देखेक टा अ’कर तेहें कलंक हेके। सेतेहें करम देउता ठिन ले उमन बरदान माँगएँला -‘पाँच बेटा पाँच बेटि।’ एकटा करम गीत माहान बेटा केर कामना केर जिकिर देखा-

“किआ बिनु सुखाए नदि रे नाला
दएआ अह’रे किआ बिनु दुनिआ आँधार
पानी बिनु सुखए नदी रे नाला
दएआ अह’रे पुतर’ बिनु दुनिआ आँधार।”

करम परब केर नाच डेग केर गिते बेटीछुआ केर सामाजिकता देखाएला। जिकिर इ र’कम भाभे ह’ए आहे-

“मएँ रचिक हाइसे गेले
मर साइसे डुमइक बुले
मएँ जेसन खाटम लेखे गो
मर पुरूस दिआ हिरा गंागा हेके।”

बेटी छुआ के घर परिबार आर खेत-गोठ केर काम-काज लेके दिन भइरे एक’ धाँउ फुरसइत काहाँ? दिन भइर काम करते-करते बेचाराँगि थइक जाएला आर बिबस ह’एकहन आपन साइस के क’हेला –

“उठा नअ गअ धरा डाँटी टा
काम करि-करि धरी गेला डाँड़ा टा।”

आरथिक इसथिति केर’ चितरन करम केर नाच-डेग केर गिते ह’ए आहे।

सागत’रे जाए रहँ एकेला जुब’तिआ
लुकाए देला
मर साग त’रा टं’कि टा लुकाए देला।”

आर’ देखा –

“एतअ बड़-बड़ परब गेल’ चेंकाइ बेसाति डुमइर पाड़ा पाड़अ हे
राँइधब’ बेसाति।”

आकाल केर कारन आरथिक तंगी केर’ बरनन देखे पारि। पंचपरगनिया छेतर’ खेति बारि केर तेहें बइरसा केर उपर निरभर आहे। सिंचाइ साधन केर ग’टाइ अभाब आहे। क’खन’-क’खन’ आकाल केर तेहें फसल नि ह’एला। एक धाँउ आकाल ह’लक, कन’ किसान मातर’ एक पइला गुंदलि पाए र’हे। इ गित टा इटाक साखी आहे-

“एक पइला गंुदलि तिन पइला पानिए
धनि रे एम’न’ आकाल कभु नाहिं जानिरे।”

20221222 145910 2
Panchpargania Karam Geete Janjivan Aar Sanskriti

Panchpargania Karam Geete Janjivan Aar Sanskriti सारांश

इ र’कम जदि पंचपरगनिया छेतर’ केर करम गित केर बाचिक करल जाए त’ म’टाम’टि सभे गिते पंचपरगनिया जन-जिबन केर आर संस्किरति केर चितरन ह’ए आहे। इ गित गिलाँए पारिबारिक, सामाजिक, आरथिक आर धारमिक परतेक पछ/प’इख केर आपन किछु न’ किछु बिसेसता उभरि आहे। इ गित गिलाँए पंचपरगनिया छेतर’ आर समाज केर परतिबिम्ब देखे पाउआएला।

संगे-संगे करम परब के मानाएक भाउना, ढंग, निअम एमाइन गिला केर बिसिस्टता परदान क’रेला। इग्ला पंचपरगनिया संसकिरति केर मुइख चिन्हाप हेके।

इन्हें भी पढ़ें :-

UGCNET TRL की जानकारी के लिए निचे दिए गए लिंक पर क्लिक करें

ugcnettrl


Share

Leave a Comment