भाषा की विशेषता | भासा केर बिसेसता

Share

भाषा की विशेषता :- मानुस एकटा सामाजिक पारानि हेके। आर सामाज मेंहेन आपन बिचार भाअ के दसर ल’ग ताहाँ तक पहुँचाना जरूरी हए जाएला इ भाभे समाज मेंहेन भासा केर ह’ना बहुत जरूरी साधन हेके। भासा केर बिना मानुस केर जिबन बितान बहुत जटिल आहे। भासाक माइधमेइ मानुस आपन मनेक बिचार दसर ल’ग ताहाँ पहँचाएला आर दसर ल’गेक बिचार के बुझेला। इ रकम भासाक बिना समाज मेंहेन गुजर-बसर करना टा दाए काथा हेके।

Table of Contents

भाषा के सम्बन्ध में विभिन्न विद्वानों का मत :-

भासाक संबंधे डाॅ0 भोलानाथ तिवारी जीक कथन इ रकम आहे –

‘‘भाषा मानव उच्चारणावयवों से उच्चरित यादृच्छिक ध्वनि – प्रतीकों की वह संरचनात्मक व्यवस्था है, जिसके द्वारा समाज विशेष के लोग आपस में विचारों का आदान – प्रदान करते हैं।’’
भासा मानुस केर उचारन तंतरि ले उचारित इआदरिछिक धउनि परतिक केर असन बेब’स्था हेके, जेकर दाराएँ कन’ सामाज बिसेस केर ल’ग आपस मेंहेन आपन बिचार केर आदान परदान करेनला।”

(भाषा विज्ञान)

आचार्य किशोरीदास बाजपेयी जीक अनुजाइ –

‘‘विभिन्न अर्थों में सांकेतिक शब्द-समूह ही भाषा है, जिसके द्वारा हम अपने मनोभाव दूसरों के प्रति बहुत सरलता से प्रकट करते हैं।’’
‘‘भिनु-भिनु अरथ’ मेंहेन इसारा कर’इआ सब्दक गठे भासा हेके, जेकर दाराएँ हामरे मन केर भाअ दसर ल’ग ताहाँ बहुत सरल भाभे पहुँचाइला।’’

(भारतीय भाषाविज्ञान)

डाॅ0 देवेन्द्रनाथ शर्मा केर अनुजाइ –

‘‘ उचारित धउनि चिन्हाक सहज’ग ले भाअ चाहे बिचार केर पुरन’ अभिबेक्ति टाइ भासा हेके।’’ चाहे ‘‘ जेकर मदद ले मानुस एक दसर संग बिचार केर लेन-देन चाहे सहज’ग करेला, उ इआदरिछिक, रूढ़, धउनि-संकेत केर बेब’स्था टाके भासा कहल जाएला।’’

(भाषाविज्ञान की भूमिका)

डाॅ0 मंगलदेव शास्त्री केर अनुजाइ –

‘‘भासा मानुस केर असन चेस्टा चाहे बेपार के कहल जाएला, जेटाले मानुस आपन उचारन उपजगि सारिरिक अब’इअब ले उचारन करल बरन’नातमक चाहे बेअक्त’ सब्दक दारा आपन बिचार गिला के परकट करेला।’’

(तुलनात्मक भाषाशास्त्र)

डाॅ0 बाबूराम सक्सेना –

‘‘एकटा पारानी (जीब) आपन कन’ अब’इअब दारा दसर पारानी (जीब) के किछु बेअकत’ कइर देला – एहे टाइ बड़े अरथएँ भासा कहल जाएला।’’

(सामान्य भाषा विज्ञान)

डाॅ0 श्यामसुन्दर दास –

‘‘मानुस आर मानुस केर मांझे कन’ जिनिस गिलाक बिस’ए मेंहेन आपन हिंछा आर मति केर आदान-परदान करेक तेहें बेअकत’ धउनि चिन्हाक जे बेब’हार हएला उटाके भासा कहल जाएला।’’

(भाषा विज्ञान)

ऑटो जेस्परसन केर अनुजाइ –

‘‘ मानुस धउनातमक सब्दक दाराएँ आपन बिचार बेअकत’ करेला, मानब गेदि आपन बिचार बेअकत’ करेक तेहें एसन सब्द’ केर बेब’हार सारातखन करेला। एसन रकमेक किरिआ कलाप के भासाक संइगा देल जाएला।’’

ऑटो जेस्परसन

प्रोज जिंस्की बेव्हम केर अनुजाइ –

‘‘आपन बडे़ रूपे भासाक अरथ’ हेके, हामरेक बिचार आर मन केर भाअ के बेअकत’ कर’इआ एसन संकेत केर सउब ज’ड़, जेके देखल चाहे सुनल जाए पाराए आर जेटाके आपन हिंछा अनुजाइ कहल चाहे द’हराल जाए पाराए।’’

प्रोज जिंस्की बेव्हम


उपरेक भिनु-भिनु बिदुआन केर परिभासा के देखले नाना रकम केर भासा संबंधी बिसेसता देखे पाउआएला। अहे तेहें भासा केर बिसेस बिसेसता गिलाक उपर नज’इर करना टा जरूरी बुझातेहे। हेंठे किछु भासाक बिसेसता देखाल जातेहे –

भाषा की विशेषता | भासा केर बिसेसता

भासा बापेक देल समपति ना लागे-

भाषा की विशेषता | भासा केर बिसेसता:- कहेक मतलब हेके कि भासा बाप ले बेटा के आपने आप नी मिलेला। माइन लेवा कन’ छुआ केर जनम हामरेक पाँचपरगना छेतर’ मेंहेन हए आहे आर किछु दिनेक बादेइ उके अइन’ जाएगा जहाँ पंचपरगनिया भासा ले अलग भासा कहेनला हुँआ पहुँचाल चाहे भेजल जाएला त’ उ छुआ टा हुंआ केर भासा आपने आप अनुकरन केर माइधमे सीखी आर कही। जेसन कन’ छुआ जनमल बादेइ छत्तिसगढ़ जाए आहे त’ छत्तिसगढ़ी सीखी, महाराष्ट्र जाए आहे त’ मराठी आर चीन जाए आहे त’ चीनी, अफ्रीका जाए आहे त’ हुंआ केर भासा अनुकरन केर माइधमे सीखी आर कही।

इसे भी पढें –

एबार संइच देखा जदि भासा मांए-बापेक देल सम्पति रहतक त’ उके पंचपरगनिया मेंहने बात करना रहे लेकिन एसन नाइ हएला। किछु साल आघु लखनउ केर एकटा अस्पाताल मेंहेन लगभग 12-13 बछर काछा-काछिक एकटा छुआ आनल जाए रहे जेटा मानुस केर रकम कनइ कहे नाइ पारत रहे। अकर बारे पाता करलेन त’ पाता चल-लक कि उके कन’ हाड़गा बहुत पहिले उठाए कहन लेजाए रहे आर तबे ले उ अहे हाड़गा टा संगे रहत रहे। अकर सउब आदत गिला हाड़गा टा रकमे हए जाए रहे।

अकर मुंह ले बाहराल हर आवाज हाड़गा टा रकमे रहे। कहेक मतलब हेके कि भासा जदि मांए-बापेक देल सम्पति रहतक ता हले उ छुआ टा अबइस’ मानुस रकम काथा कहतक काहेकि उ छुआ टा गुंगा छुआ नी रहे। इ रकम भाभे भासा मांए-बाप ले ना पावाए कहन जन छेतर’ मेंहेन रहल जाएला हुंआ आपने आप अनुकरन केर दाराए सीखल आर कहल जाएला।

भासा अरजल समपति हेके- कहेक मतलब हेके कि हामरे जन छेतर’ चाहे परिबेस मेंहेन रहीला हुंआक आस-पास मेंहेन जन भासा केर बेब’हार करल जाएला उ भासाकेर सब्द’ के सीखीला जानीला आर कहेक मेंहेन बेब’हार करिला। यानी कि हामरे भासा केर अरजन करिला।

भासा सुरू ले आखरि तक सामाजिक बस्तु हेके-

भाषा की विशेषता | भासा केर बिसेसता :- इटाक मतलब हेके कि हामरे सामाज मेंहेन रहिला आर सामाज मेंहनेइ भासा केर दरकार हएला, जदि सामाज नेखे त’ फिर भासाक दरकार हबे नि करी, केकर संग कही? कहेक मतलब हेके कि हामरे सामाज मेंहेन रहिला, जाहाँ एक दसर लग संग आपन-भाव बिचार गिला साझा करेक यानी दसर लग तक पहंचाएक तेहें भासाक उपरेइ निरभर रहीला। अहे तेहें सामाज आहे त’ भासा आहे। अहे तेहें हिंआ कहल जाए आहे भासा सुरू ले आखरि तक सामाजिक बस्तु हेके।

भासा अनुकरनेक दाराएँ सीखल जाएला-

भाषा की विशेषता | भासा केर बिसेसता :- कनइ भी छुआ भासा आपन मांएक पेट भीतर लेइ सीख कहन नाइ आएला बल्कि उ आपन आस-पास जन भासाक बेब’हार हएला उ भासाक छटे-छटे सब्द’ गिलाक अरजन करेला आर सीखेला। उ सामाज मेंहेन जन सब्द’ गिला सुनेला अहे गिलाकेइ नकल यानी अनुकरनेक कइर कहन समझेल, बुझेला आर आत्मसात कइर कहन अरजन करेला आर कहेक मेंहेन बेब’हार करेला।

जेसन कन’ छुआक आस-पासे कन’ लग जेसन आवाज करेला उह’ असने नकल करेक चेस्टा करेला। उ छटे-छटे आवाज जेसन बा-बा, माँ-माँ, बु-बु ले कहे सुरू करेला आर जटिल ले जटिल आवाज केर’ उचारन करे लागेला। इग्ला सउब मानुस केर भीतरे छिपल अनुकरन सक्तिक दाराऐ संभव हएला। नामकरा युनान केर दारस’निक अरस्तु केर कहना हेके कि मानुस केर सउबले बड़े गुन अनुकरन हेके। मानुस भासा सीखेक मेंहेन एहे गुन केरे बेब’हार करेला।

भासा बदल’इआ जिनिस हेके-

भाषा की विशेषता | भासा केर बिसेसता :- हामरे जन भासा टा कहिला उटा अनुकरन ले सिखीला किंतु सउब लगेक सारिरिक मानसिक इसतिथि एक रकम नाइ रहेला अहे तेहें अनुकरन करेक खेम’ता टाउ एक रकम नाइ रहेला एतब कारने अनुकरन मेंहेन किछु-न-किछु अनतर रहेला। आर एहे गिलाइ धीरे-धीरे कइर कहन भासा मेंहेन बदलाव आनेला। एकर अलावा इसतिथि आर परिस्थिति मेंहेन बदलाव आते रहेला आर ताकर अनुजाइ भासा मेंहे नावा-नावा सब्द’ जड़ाते जाएला। आर भासा बदलते रहेला। आइज जे पंचपरगनिया भासाक रूप देख’तिहि इटा 500-700 साल पहिल अलग रहे। कहेक मतलब भासा बद-लते रहेला।

भासा केर आखरी (अंतिम) रूप नाइ ह’एला-

भाषा की विशेषता | भासा केर बिसेसता :- कनइ भी चीज बस्तु बइन कहन पुरा हएला त’ उटाके अकर आखरि रूप मानल, कहल जाएला। लेकिन भासाक संबंधे इ काथा टा लागु नी हएला। इकर कबउ आखरि रूप नाइ हएला। यानी कि इटा कबउ नी कहल जाए पाराए कि फालना भासा केर फालना रूप टा आखरि चाहे पुरन’ रूप हेके। हं तबे आखरि रूप अहे खने हएला जखन कन’ भासा मइर जाएला। कहेक मतलब हेके कि भासा हमेसा चेंज आर अइसथिर रहेला।

कन’इ भी भासा केर एकटा भउग’लिक सीमा हएला-

हर भासा केर एकटा निसिचित सीमा हएला। उ सीमाटाइ उ भासाटाक आपन बास्तबिक छेतर’ हएला। उ सीमा टा ले बाहिर अकर सरूप मेंहेन अन्तर हए जाएला चाहे उ सीमा टा ले बाहिर कन’ दसरा भासाक सीमा सुरू हए जाएला। जेसन पंचपरगनिया भासाक आपन भउग’लिक सीमा मुइख रूप मेंहेन पाँचपरगना हेके। इकर ले बाहिर एकर रूप मेंहेन तनिक आधेक अन्तर चाहे दसरा भासाक छेतर’ सुरू हए जाएला।

इसे भी पढें –

कन’इ भी भासा केर एकटा इतिहासिक सीमाउ हएला-

भाषा की विशेषता | भासा केर बिसेसता :- भउग’लिक सीमाक रकम हर भासाक इतिहासिक सीमाउ हएला। यानी कन’ भासा कन’ निसिचित समइ मेंहेन सुरू हएकहन इतिहास केर कन’ निसिचित काल तकेइ बेब’हार हएला इकर बादे एकटा नावा भाभेक भासाक चलन सुरू हए जाएला। जेसन कि हामरे पहिले जानलि कि भासा हमेसा बदलते रहेला। त’ कनइ भासा बदलते-बदलते एतना बदली जाएला कि एकटा नावा रकमेक भासाक जनम हए जाएला। इटा एतना धीरे-धीरे हएला कि हामरेके माताइ नाइ चलेला। जेसन- पालि, प्राकृत, अपभ्रंश एमाइन।

हर भासा केर आपन अलग संरचना हएला-

भाषा की विशेषता | भासा केर बिसेसता :- कहेक मतलब हेके कि कनइ भी दुइ टा भासा केर ढाँचा समपुरन’ रूप मेंहेन एक रकमेक नाइ रहेला। अकर धवनि, सब्द’ रूप, बाइक’ चाहे अरथ’ एमाइन मेहने कांहु न कांहु अन्तर रहबे करेला। जेसन पाँचपरगना केर ढेइर लग इटा संचेनला कि पंचपरगनिया कुड़मालि एके भासा हेके लेकिन अन्तर साफ देखे पावाएला। जेसन इ बाइक’ गिला के देखा-

  • पंचपरगनिया –
    • बरद टा चरेला।
    • गाइ टा चरेला।
  • कुड़मालि –
    • बरद टा चरेइसाहे।
    • गाइ टी चरेइसाहि।

हिंआ साफ देखातेहे जे पंचपरगनिया भासा मेंहेन करता (कर्त्ता ) केर लिंग केर अनुजाइ किरिआ (क्रिया) मेंहेन कन’ चेंज नेखे। मतलब करता (कर्त्ता ) बरद (पुलिंग) आर गाइ (तिरिलिंग) दुइअ केर तेहें एके रकमेक किरिया ‘चरेला’ आहे हुंआइ कुड़मालि मेंहेन करता केर लिंग केर अनुजाइ किरिया मेंहेन चेंज देखेपावातेहे। मतलब करता (कर्त्ता ) बरद (पुलिंग) केर तेहें किरिया चरेइसाहे आर करता (कर्त्ता) गाइ (तिरिलिंग) केर तेहें अलग किरिया चरेइसाही केर बेब’हार देखेपावातेहे। आर’ एकटा निमुद देखा-

  • पंचपरगनिया –
    • मएं खा तहं/मएं खाए लाइग आहं।
  • कुड़मालि –
    • हामि/मंय खाहं/हामि/मंय खाउअहं।

हिंआ पंचपरगनिया केर बाइक मेंहेन साफ देखातेहे जे खा तहं चाहे खाए लाइग आहं अलग-अलग आहे किंतु कुड़मालि मेहेन पंचपरगनिया केर खा तहं केर बदले खाहं आर खाए लाइग आहं केर बदले खाउअहं आहे। पंचपरगनिया आर कुड़मालिक उपरेक दुइअ निमुद मेंहेन बेआकर’निक आर आकिरतिगत यानी रूपगत अन्तर देखाएला। कहेक मतलब हेके कि हर भासा केर आपन अलग-अलग आलेदा चिन्हाप आहे।

भासा केर गमन कठिन ले सरल बाटे ह’एला-

भाषा की विशेषता | भासा केर बिसेसता :- एकटा कहावत हेके फेड़े कंठर पाले के गाछ चेढ़े जाइ। मानुस केर इटा आदत हेके कि बेसी कस्ट’ ना कइर खने काम टा हउक। भासाक मेहनउ इटा लागु आहे। केकर’ नाम जदि पुरेन्द्र हेके हले उके कहबंए पुरेन, केकर’ नाम दीनबंधु हेके त’ उके कहबंए दीनु आर सत्येन्द्र हेके त उके सतेन कहबंए। एसन’ अवस्था आए जाएला जहाँ उपरेक नाम गिलाके पुना, दीना, सतु चाहे सति कइ कहन’ काम चालाए लागेनला। एसने अनइ’ सब्द’ मेहनेउ लागु हएला। कहेक मतलब हेके कि भासा नदीक धारा रकम हेके जेटा उपर ले हेंठ बाटे बहेला।

भासा संज’ग ले बिज’ग बाटे जाएला –

संजग के अरथ’ हेके मिलल इस्तिथि यानी अरथ’ तत् आर रचना तत् मिलल रहेला आर बिजग केर अरथ’ हेके अलग हल इसतिथि यानी रचना तत् अरथ’ तत् संग ना जड़ाएकहन अलग से बेब’हार हए लागेला। जेसन – ‘‘मंए खातं’’ संजोग केर इसतिथि हेके आर ‘‘मंए खाए लाइग आहं’’ बिजग केर इस्तिथि हेके जबकि दुइअ डांड़ी केर एके अरथ’ हएला। कहेक मतलब हेके कि पंचपरगनिया भासा मेंहेनउ इ बिसेसता टा देखाएला।


Share

Leave a Comment