Panchpargania Bhasha Ka Namkaran| पंचपरगनिया भाषा का नामकरण

इतिहास आधार पर विभिन्न नाम एवं विद्वानों के मत

प्रस्तावना

Panchpargania Bhasha Ka Namkaran : कन’ भि भासा केर नाम किबल एकटा चिन्हाप मातर’ नि ह’एला, बलकि उ भासा केर इतिहास, संसकिरिति, सामाज, भुग’ल आर बिकासा जातरा केर आएना ह’एला। भासा केर नाम ले इटा फरिच ह’एला कि उ भासा केर उतपति का नियार ह’लक, उटाके कह’इआ ल’ग कन-कन समुदाय ले संबंध राख’एँला आर सामाज मेंहेन उकर का इसथान आहे।

पंचपरगनिया भासा झारखंड केर एकटा नामकरा छेतरीय आर संपरक’ भासा हेके। एखन जनटा ‘‘पंचपरगनिया’’ नामे जानल जाएला, उटा इतिहास केर भिनु-भिनु कालखंडे अनेक नाम ले जानल जात रहे। कखन’ एके गाँवारी, कखन’ सदानी, सदरी, तमड़िआ, दिकुकाजी आर अइन’ नाम ले डाकल जात रहे। समइ केर संगे-संगे इ सउब नाम बदलते गेलक आर आइज ‘‘पंचपरगनिया’’ नाम ले बेआपक रूपे सइकिरित ह’ए गेलक।

अहे तेहें Panchpargania Bhasha Ka Namkaran केर अइधन किबल एकटा नाम केर अइधन ना हएकहन, इ भासा केर एइतिहासिक, सामाजिक, सांसकिरितिक आर भासिक बिकास केर अइधन हेके।

पंचपरगनिया भाषा के विभिन्न नाम

इतिहास केर भिनु-भिनु चरन मेंहेन पंचपरगनिया भासा के हेंठे देल नाम ले जानल जात र’हे।

• गाँवारी
• खेरवारी
• अहीरी
• सदानी
• सदरी/सादरी
• तमड़िया
• दिकुकाजी
• टाँइड़ बांगला
• टाँइड़ राजिआ
• पयारी
• हेंठराजिआ
• पंचपरगनिया

इ सउब नाम केर पेछुइं भिनु रकमेक एइतिहासिक, सामाजिक चाहे भासिक कारन रइ आहे।

गंउआरी नामकरण

गाँवारी नाम केर अरथ’

‘‘गाँवारी’’ सबद’ ‘‘गाँव’’ ले बनल आहे। गाँव मेंहेन रह’इआ ल’ग ज’न भासा केर बेब’हार कर’एँला, उटाके गाँवारी कहल जाएला।

पुरना समइ मेंहेन गाँव छेतर’ केर भासा के सामाइन’ रूपे ‘‘गाँवारी’’ कहेक परंपरा रइ आहे। काहेकि पंचपरगनिया केर बेब’हार मुइख रूपे गाँव-देहात मेंहेन ह’त रहे, अहे तेहें इ भासा टाकउ गाँवारी कहल जात र’हे।

इ नाम केर भासा गारामिन सरूप के जानाएला, किंतु इ नाम किबल पंचपरगनिया तके सीमित नेखे बलकि झारखंड केर अइन’ गारामिन भासा गिलाक तेहंउ बेब’हार ह’त रहे।

अहे कार’ने ‘‘गाँवारी’’ नाम टा बेआपक हलउ, नामजादि चिन्हाप देवाए नि पारलक।

खेरवारी नामकरण

पंचपरगनिया भासा केर एकटा पुरना नाम ‘‘खेरवारी’’ मानल जाएला। डाॅ. करम चंद्र अहीर जिक अनुजाइ अहीर समुदाय केर आगमन बार उमन केर जीबन – सइली संगे इ नाम टा जुड़ल आहे।

इमनेक मत अनुजाइ पांचपरगना छेतर’ मेंहेन बस’बास कर’इआ अहीर समुदाय आरथिक रूपे कमज’र रहएँ आर खेर घास ले बनल घरे रहत रहएं। एहे कार’ने उमन केर भासा के ‘‘खेरवारी’’ कहल जाए लागलक।

द’सर मत अनुजाइ इ नाम खेरवार समुदाय संगे जुड़ल हए पारेला।

किंतु एखन ‘‘खेरवाारी’’ नाम लगभग अपरच’लित ह’ए चुइक आहे आर आलेदा रूपे खेरवार जनजाति संगे बेसि जुड़ल मानल जाएला।

सदानी नामकरण

झारखंड मेंहेन ‘‘सदान’’ सबद’ गइर-आदिवासी समुदाय केर तेहें बेब’हार करल जाएला। सदान ले बनल सबद’ ‘‘सदानी’’ केर अरथ’ हेके- सदान समुदाय केर भासा।

झारखंड मेंहेन आदिवासी समुदाय गिला केर आपन जातिगत भासा जेसन –

• मुंडारी
• संथाली
• हो
• खड़िया
• कुड़ुख

एमाइन केर बेब’हार करल जाएला।

एहे रकमे गइर-आदिवासी समुदाय आर आदिवासी समुदाय के ज’ड़ेक तेहें जन भासा गिलाक बेब’हार करल जाएला उगलाके सामुहिक रूपे ‘‘सदानी’’ कहल जाएला। इ नज’इरे पंचपरगनिया भासा कउ सदानी समुह केर भासा मानल जाएला।

सदरी या सादरी

Panchpargania Bhasha Ka Namkaran केर संबंध मेंहेन ‘‘सदरी’’ चाहे ‘‘सादरी’’ नाम केर’ उल्लेख पावाएला। किंतु इ नाम टा पंचपरगनिया भासा केर मुल चाहे सरब’माइन’ नाम नि मानल जाएला। भिनु-भिनु बिदुआन गिला इ सबद’ केर उतपत्ति आर बेब’हार केर संबंध मेंहेन अलग-अलग मत दे आहएं।

डाॅ. उदय नारायण तिवारी केर अनुजाइ ‘‘सदरी’’ सबद’ केर संबंध उत्तर भारत मेंहेन परच’लित फारसी-उर्दू सबद’ ‘सदर’ ले मानल जाएला, जेकर अरथ’ मुइख’ चाहे परधान हएला। उमन केर अनुजाइ इ सबद’ उ ब’लि केर तेहें बेब’हार हलक जेटा भिनु-भिनु समुदाय केर माझे संपरक’ भासा केर रूपे बेब’हार मेंहेन रहे।

दसर बाटे डाॅ. श्रवण कुमार गोस्वामी इमन केर मत ले पुरन’ रूपे सहमत नाइखेन। इमन केर मत हेके कि ‘‘सदरी’’ सबद’ केर संबंध ‘‘सदान’’ चाहे ‘‘सदान समुदाय’’ केर बेसि पासे आहे। इमन केर अनुजाइ नागपुरी छेतर’ मेंहेन गइर-आदिबासी चाहे सदान समुदाय केर भासा के ‘‘सदरी’’ कहल जाए लागलक। इ नज’इरे ‘‘सदरी’’ केर अरथ’ ‘‘सदान केर भासा’’ बुझल जाए पाराए।

डाॅ. गोस्वामी जी उमनउ फरिच कइर आहएं कि नागपुरी भासा के ढेइर ल’ग ‘‘सदरी’’ नाम ले जानंएला। इमन केर अनुजाइ ‘‘सदरी’’ सबद’ केर बेब’हार मुइख रूपे नागपुरी भासा-छेतर’ तके सीमित रहलक। इमन इटाउ फरिच कइर आहएं कि झारखंड ले बाहिर, बिसेस कइर कहन असम आर किुछु चाय-बागान छेतर’ मेंहेन, झारखंड ले गेल मजदुर समुदाय केर दाराएं बेब’हारित संपरक’-भासा कउ ‘‘सदरी’’ कहल गेलक।

Panchpargania Bhasha Ka Namkaran मेंहेन इ तइथ बिसेस रूपे नामकरा हेके कि पांचपरगना छेतर’ मेंहेन सामाइन’ जन-जीबन मेंहेन ‘‘सदरी’’ नाम केर बेआपक बेब’हार नि मिलेला। डाॅ. पराग किशोर सिंह जि उमरउ इ तइथ बाटे संकेत कइर आहएं कि पंचपरगनिया छेतर’ केर ल’ग आपन भासा के पंचपरगनिया नामेइ जानएंला।

इ संबंध मेंहेन पंचपरगनिया भासा आर संसकिरिति केर नामकरा अइधन क’रा स्वर्गीय ज्योतिलाल महादानी केर कथन नामजादि आहे। इमन मुण्डा समुदाय ले संबंधित आपन अइधन मेंहेन लिख आहएं कि धरमपुर केर मुड़ा गिला पंचपरगनिया कहंएला आर पंचपरगनिया गित गितकाएंला।

हिंआ धेआन देएक आहे कि इमन ‘‘सदरी’’ सबद’ केर बेब’हार नि कइर आहएं, बलकि सीधा ‘‘पंचपरगनिया’’ सबद’ केर बेब’हार कइर आहएं। इटाले फरिच हएला कि पांचपरगना छेतर’ मेंहेन भासा केर चिन्हाप ‘‘पचंपरगनिया’’ नाम लेइ बेसि जानल जाएला।

विश्लेषण

उपरेक कथन केर आधारे कहल जाए पाराए कि ‘‘सदरी’’ चाहे ‘‘सादरी’’ सबद’ मुइख रूपे नागपुरी भासा-छेतर’ आर कुछ संपरक’-भासाइ परिसतिथि ले संबंधित रइ आहे। जइदपि कुछ बिदुआन पंचपरगनियाक तेहंउ इ नाम केर उल्लेख कइर आहएं, तथापि पांचपरगना छेतर’ केर भासिक बेब’हार, लोक-इसमिरिति आर साहितिक परंपरा मेंहेन ‘‘पंचपरगनिया’’ नाम टाइ बेसि परचलित, सभाबिक आर सइकार रइ आहे।

इ रकम ‘‘सदरी’’ चाहे ‘‘सादरी’’ पंचपरगनिया भासा केर एकटा एइतिहासिक चाहे संदरभ’गत नाम मानल जाए पाराए, किंतु बरत’मान समइए इ नाम टा ना त’ सरब’माइन’ आहे आर ना त’ पंचपरगनिया भासा केर बासत’बिक आर सतंतर’ चिन्हाप केर परतिनिधित करेला। आइज साहित, सिक्छा, स’ध आर सरकारी असतरे ‘‘पंचपरगनिया’’ नाम टाइ माइन’ आहे।

तमड़िआ नामकरण

पंचपरगनिया भासा केर एकटा नामकरा पुरना नाम ‘‘तमड़िया’’ रइ आहे। एकर संबंध मेंहेन डाॅ. जाॅर्ज ग्रियर्सन लिख’एंला –

‘‘पूर्वी मगही का यह रूप जो पाँचपरगना में बोला जाता है, पंचपरगनिया के नाम से ख्यात है। चूँकि तमाड़ में इसका अधिक प्रचलन है, अतः इसे तमड़िया भी कहा जाता है।’’

ग्रियर्सन केर मत अनुजाइ तमाड़ छेतर’ मेंहेन इ भासा केर बेआपक बेब’हार ह’एक कार’ने इके तमड़िया कहल गेलक।

किंतु बाद केर बिदुआन गिला फरिच कइर आहएं कि तमड़िया कन’ अलग भासा ना हएकहन पंचपरगनिया केर एकटा नाम मातर’ हेके।

दिकुकाजी नामकरण

‘‘दिकुकाजी’’ दुइ सबद’ ले बनल आहे-

• दिकु
• काजी

मुण्डारी परंपरा मेंहेन ‘‘दिकु’’ केर अरथ’ बाहरी चाहे गइर-आदिबासी लग ले जड़ल जाएला आर ‘‘काजी’’ केर अरथ’ भासा चाहे बात-चीत हएला।

अहे कारने आदिबासी समुदाए कखन’-कखन’ गइर -आदिबासी समुदाय केर भासा के ‘‘दिकुकाजी’’ कहँएला।

किंतु बरत’मान सम’इए मेंहेन इ नाम लगभग लुकाए जाए आहे आर पंचपरगनिया केर तेहें इकर बेब’हार निहिं केर बराबइर आहे।

पंचपरगनिया नाम की उत्पत्ति

पंचपरगनिया

Panchpargania Bhasha Ka Namkaran केर संदरभ’ मेंहेन ‘‘पंचपरगनिया’’ टाइ इ भासा केर सउबले बेसि परच’लित, सइकार करल आर बासत’बिक नाम मानल जाएला। तथापि इतिहास केर भिनु-भिनु काल मेंहेन इ भासा के गांवारी, खेरवारी, सदानी, तमड़िया आर दिकुकाजी एमाइन नाम लेउ जानल गेलक, किंतु बरत’मान सम’इ मेंहेन पाँचपरगना छेतर’ केर भितर आर बाहिर दुइ जाएगाएं ‘‘पंचपरगनिया’’ नाम टाइ बेसि बेआपक रूपे चलन मेंहन आहे।

समामाइन’ रूपे इटा मानल जाएला कि पंचपरगनिया नाम केर संबंध पाँचपरगना छेतर’ ले आहे, किंतु भासिक आर सांसकिरतिक नज’इरे एकर अरथ’ इटाले कांहु बेसि बड़े आहे। बासतब मेंहेन पंचपरगनिया किबल कन’ भु-भाग केर नाम ना लागे, बलकि उ बिसाल छेतर’ मेंहेन बस’बास कर’इआ भिनु-भिनु जातीय आर सामाजिक समुदाय केर साझा संपरक’-भासा केर परतिक(चिन्हा) हेके।

पाँचपरगना छेतर’ मेंहेन बहुत पुरना समइ लेक ढेइर जाइत आर समुदाय बस’बास करते आए आहंए। परतेक समुदाय केर आपन अलग जातिगत भासा, ब’लि, संसकिरति आर जिबन जिएक तरिका रइ आहे। किंतु सामाजिक संपरक’, बेपार, हाट-बाजार, बिहा-संबंध आर सामुदायिक जिबन केर कारन भिनु-भिनु समुदाय केर माझे एक दसर संग संबाद केर दरकार हलक। एसन इसतिथि मेंहेन एकटा एसन संपरक’-भासा केर बिकास हलक जेटाले सभे समुदाय केर लग कन’-न’-कन’ रूपे बुझे आर बेब’हार करे पारे। एहे भासा टाइ कालकरमे बिकसित हएकहन पंचपरगनिया केर रूपे धारिज हलक।

इ नज’इरे पंचपरगनिया के किबल पाँच परगना केरे भासा कहेक टा ठिक नि ह’इ, बलकि इटाके ढेइर जातीय भासा आर सांसकिरतिक परंपरा केर आपसी सामंजइस ले बिकसित एकटा साझा भासा कहना बेसि उचित ह’इ।

पंच + पर + गन + इया : शब्दार्थ एवं व्याख्या

ष्पंचपरगनियाष् शब्द का भाषिक विश्लेषण निम्न प्रकार से किया जा सकता हैकृ

‘‘पंचपरगनिया’’ सबद’ केर भासिक बिसलेसन हेंठे देल रूपे करल जाए पाराए-

इ रकम ‘‘पंचपरगनिया’’ सबद’ केर बेआपक अरथ‘ हलक-

‘‘अनेक (ढेइर) भिनु-भिनु जाती समुदाय केर भासिक बिसेसता ले बनल साझा भासा।’’

हिंआ ‘‘पंच’’ सबद’ केर अरथ’ किबल संइखा ‘‘पाँच’’ ना लागे। लक बेब’हार मेंहेन पंच केर अरथ’ साधारन रूपे ‘‘अनेक’’ चाहे ‘‘पाँ ले बेसि’’ मानल जाएला। जेसन पंचाएती बेब’सथाएं ‘‘पंच’’ किबल पांच लग तके सिमित नाइ रहेनला, बलकि समुदाए केर सभे परतिनिध केर ब’ध क’राएला। अहे रकमे पंचपरगनिया मेंहेन ‘‘पंच’’ केर अरथ’ अनेक (ढेइर) समुदाए लेउ ज’ड़ल जाए पाराएला।

‘‘पर’’ केर अरथ’ भिनु-भिनु चाहे अलग-अलग हेके, जबकि ‘‘गन’’ जनसमुदाय चाहे जातीय समुदाय केर ब’ध क’राएला। ‘‘इया’’ भासा-सुचक परतए हेके, जेटा कन’ भासिक रूप बाटे इसारा करेला।

पंचपरगनिया : एक समन्वित संपर्क भाषा

जदि एइतिहासिक नज’इरे देखल जाए त’ पाँचपरगना छेतर’ मेंहेन बस’-बास कर’इया भिनु-भिनु समुदाय केर आपन-आपन जातिगत भासा रहे। एसन मेंहेन एक समुदाय केर लग केर तेहें दसर समुदाय केर भासा के बुझना टा दाए काथ रहे। किंतु सामाजिक जिबन के बेस लेखेर चालाएक तेहें एक दसर संग संबाद जरूरी रहे।

परिनाम रूपे भिनु-भिनु भासा आर ब’लि केर संपरक’ ले एक एसन भासा बिकसित हलक जेटाएं अनेक भासिक तत मेसल रहे। इ भासा टा कन एक जाइत केर भासा नि रहे, बलकि सभे समुदाय केर साझा भासा रहे। एहे कारन इटाएं भिनु-भिनु जातीय भासा, लकभासा आर बादे बाहिर ले आल भासाइक लसिंद केर’ समाबेस ह’तके गेलक।

समइ केर संगे इटा संपरक’-भासा टा बेसि परिसकार ह’ते गेलक आर पांचपरगना छेतर’ केर मुइख लकभासा केर रूपे थापित ह’ए लागलक। बाद केर सम’इए इटाएं बांगला, उड़िया आर एकर आसे-पासेक भासाक संपरक’ लेउ एकर सबद’-भंडार आर अभिबेकति-छमता केर बिसतार हतके गेलक।

निष्कर्ष

उपरेक बाचिक केर आधारे कहल जाए पाराए कि ‘‘पंचपरगनिया’’ नाम किबल एकटा भउग’लिक चिन्हाप ना लागे, बलकि अनेक जातीय समुदाय केर साझा संसकिरति आर भासिक बिरासत केर परतिक हेके। इ भासा टा भिनु-भिनु समुदाय केर आपसी संपरक’, सह-आसतित आर सांसकिरतिक आदान-परदान केर परिनाम हेके। एहे कार’ने आइज ‘‘पंचपरगनिया’’ नाम टा इ भासाटाक तेहें सउबले बेआपक, सारथक आर बइगानिक चिन्हाप केर रूपे थापित हए चुइक आहे।

विद्वानों के मत

प्रो. परमानंद महतो जि केर अनुजाइ-

पंचपरगनिया नाम सउबले बेआपक, सारथक आर पर’चलित नाम हेके। अइन’ सभे नाम पंचपरगनिया केर परेआएबाचि रूप मातर’ हेके।

डॉ. जॉर्ज ग्रियर्सन

ग्रियर्सन पंचपरगनिया के पुरबी मगही केर रूप मानलएं, किंतु बाद केर शोध गिलाएं इके आलेदा भासिक चिन्हाप आउला भासा सिध करेक परेआस कइर आहएं।

डॉ. उदय नारायण तिवारी

उमन पंचपरगनिया के भोजपुरी समूह संगे जोड़ष्एँला।

डॉ. श्रवण कुमार गोस्वामी एवं डॉ. बी. पी. केसरी

इमन पंचपरगनिया के नागपुरी संगे निकट संबंधी मानष्एँला।

पंचपरगनिया नाम की व्यापक स्वीकृति

पंचपरगनिया नाम हेंठे देल कार’ने सउबले बेसि सइकार करल जाए आहे-

• कन’ एक जाति बिसेस तके सीमित नेखे।
• संपुरन’ पांचपरगना छेतर’ केर परतिनिधत करेला।
• संपरक’ भासा केर बासत’बिक सरूप के बेअक्त’ करेला।
• साहित, सिक्छा, आर शोध मेंहेन एहे नाम नाइ चलन मेंहेन आहे।
• सरकारी असतरे माइनता मिलल नाम हेके।

वर्तमान स्थिति एवं सरकारी मान्यता

बरत’मान समइ मेंहेन ‘‘पंचपरगनिया’’ टाइ इ भासा केर आधिकारिक, पर’चलित आर सइकिरित नाम हेके।

झारखंड सरकारेक दाराएं साल 2011 इसबिए इ भासा टाके दितिअ राजभासा केर दरजा देल गेलक। एखन इ भासा केर अइधन-अइधापन, साहितिक सिरजन, शोध काम आर परतिज’गि परीछा मेंहेन बेब’हार लागातार बाढ़’ते जातेहे।

सारांश

Panchpargania Bhasha Ka Namkaran : इतिहास केर भिनु-भिनु कालखंड मेंहेन पंचपरगनिया भासा के गांवारी, खेरवारी, सदानी, सदरी, तमड़िया आर दिकुकाजी एमाइन अनेक नाम ले जानल गेलक। इ सउब नाम केर पेछुइं भिनु रकमेक सामाजिक, सांसकिरतिक आर भासिक कारन रइ आहे। किंतु बरत’माने ‘‘पंचपरगनिया’’ नाम सउबले बेआपक, बइगानिक आर सइकिरित मानल जाएला। इ नाम पांचपरगना छेतरएं बस’बास कर’इआ भिनु-भिनु जातीय समुदाय केर साझा भासिक आर सांसकिरति चिन्हाप केर परतिनिधित करूआएला। एहे कारने आइज सिक्छा, साहित, शोध आर सरकारी असतर मेंहेन ‘‘पंचपरगनिया’’ नाम टाइ सरब’माइन’ रूपे थापित हए चुइक आहे।