Panchpargania Riddle| Puzzle | Paheli

Panchpargania Riddle :- Riddle के अइन’ नामउ जानल जाएला जेसन पहेलि, प्रहेलिका, रिडिल, बुझ’उअल एमाइन । इग्लाक अरथ’ हएला – कहल काथा टाकेर अरथ’ बुझेक ।Panchpargania Riddle (जान कहनी ) के सामाइन’ रूपे तिनटा नामे जानल जाएला 1. जानकहनि 2. बुझ’उअल आर 3. हेआँलि ।

Panchpargania Riddle केर परिभासा

एसन बाइक जेटाएँ कन’ चिज बस्तु केर लछन केर आधारे घुराए फिराए कहन भारामक रूप मेंहेन दे कहन अहे लछन केर आधारे नाम कहुआएक चेस्टा करल जाएला । मतलब कन’ काथा के एसन सब्दाउलि मेंहेन पुछना कि सुन’इआ के उटा बुझेक मेंहेन बहुत बेसि दिमागि कसरत चाहे सं’चे हएला । घुराए फिराए कहन कन’ काथा के कहना टाइ जान कहनि हेके ।

जान कहनि मेंहेन, कन’ चिज केर जान कहनि बनाएक रहेला त’ उकर रूप, गुन, काम एमाइन गिला अइन चिज केर रूप, गुन, काम एमाइन लछन संग ज’इड़ कहन बरनन करल जाएला जेटाएँ सुन’इआ के संइच बुइझ कहन, दिमागि कसरत कइर कहन जबाप खजे ह’एला ।

Panchpargania Riddle केर दरकार

बुझ’उअल/जानकहनि के कन’ ल’ग केर बुइद के जानेक चाहे अकर बुइद केर परिछा लेएक तेहें, एक परकार केर परस्न’ रहेला जेटाएँ कन’ चिज केर लछन केर आधारे दसरा चिज के लइछ कइरके घुराए फिराए कहन पुछल जाएला ।

Panchpargania Riddle केर जनम

बुझ’उअल केर जनम उ समइ हए ह’इ जखन ल’ग कन’ बातटा सउब केर पासे नि कहे ख’जत ह’बंए, सउब के उ काथा टा ना जानुन सेइ तेहें उ काथाटाके अइन’ चिज संग लइछ कइर के घुराए फिराए कहन सउब केर पासे कहत हबेन ।

Panchpargania Riddle केर महत

• बुइद के परखेक तेहें Panchpargania Riddle (बुझ’उअल) के नामकरा साधन मानल जाएला । इ रकम गांउ बाँटे खास कइर कहन बिहा सादि मेंहेन बर-क’नेआ केर बुइद के जानेक तेहें करल जाएला । एसन नज’इरे एकर बागरा महत आहे ।
• मन’रंजन केर रूपउ Panchpargania Riddle (बुझ’उअल) केर ढेइर महत आहे । खास कइर कहन छुआ के दिमागि कसरत करूआएक नज’इरे इटा बहुत कामि जिनिस हेके । काहेकि इटा ले छुआ केर मन’रंजन केर संगे-संगे बुइद केर’ बिकास हएला ।
• मानुस केर भाअ अभिबेक्ति, मानब केर बुइदेक धचर आर ल’क साहित केर बिकास सिढि़ के बुझेक तेहें Panchpargania Riddle (बुझ’उअल) नामकरा महत राखेला ।
• Panchpargania Riddle (बुझ’उअल मन’रंजन) केर बुढ़ा – पुरखा बिधा हेके अहे तेहें इटाएँ पुरना सम’इएक झलक केर जानकारि आसानि ले मिलेला । जदि कनइ भि भासा केर बुझ’उअल के संकलन कइर के उकर बइगानिक अइधन करल जाए त’ पुरना सम’इएक इतिहास काथाक संगे-संगे उ छेतरक भासा गेआन, संसकिरति, सइभताक बिकास आर बुढ़ा पुरखाक बुइद, गेआन एमाइन केर जानकारि मिलेला । इ नज’इरे एकर महत बाइढ़ जाएला ।

Panchpargania Riddle केर बांटा | खेजा

खेति बारि संबंधि जानकहनि –

• एक हांथ बर’दा बार’ हांथ सिंग, नाचे बरदा हिटिंग टिडि़ंग ?
• घेंचाएँ फांसि चुतराए माटि, चुड़पि उठे हारामजादि ?
• काठेक कठउरा ल’हाक ठर, आघुइं बकलि पेछुइं च’र ?
• पात न’ पात एक बिताक पात, बार’ मुठाक गाछ ?

घरेक जिनिस ले –

• एकटा छुआ बिहानेइ उइठके घिंसरि बुलेला ?
• जाइसला त’ जाइसला, मके काने मचडि़ राख ?
• एकटा बुढि़ र’जे नाहाए धउआए के टिल्हा उपरे बइसे ?
• छटे-मटे ड’भा फुल फुटे स’भा ?

खान-पान ले –

• सुखल बाँधे बकलि हादबादाए ?
• धुंध लुका कारिआ चुका ?
• भरल बांधे चाँच गरग’राए ?

पर’किरति ले संबंधित –

• बन झाड़ पडि़ गेल लिपि आंड़ा र’हि गेल ?
• मांझ बने चंउरि गिरल
• लिकलिक डाँडि़ चिकचिक पात, खात के मधु फेंकत के रूआ ?
• स’नाक तितिर रूपाक ठ’र, उड़गे तितिर सरगेक अ’र ?
• एकटा गाछे सुधाइ ढेंपसा ?
• एकटा गाछे तिनटा तिअन ?

छुटु-छुटु जिब-जंतु ले संबंधित –

• रने बने चल’इआ लाल पानि पिअ’इआ ?
• अरून बने बारहा चले ?
• हाड़ न’ माँस गल-गल गात ?
• एकटा च’रइ केर पुंइछे पएसा ?

देह’ संबंधि –

• हुकुड़ कुंबा दुइटा दुआइर ?
• बतिस राजा धान कुटे, एकटा राजा उसकाए ?

पिंधना अ’ढ़ना ले संबंधित –

• आंड़ा भितरे सांढ़ा ब’ले ?
• मुंड़ नेखे कान आहे, हांथ आहे ग’ड़ निहिं ?
• मरल काँट’ जिअंत राखं, रकते बाँध’ आइड़, ढेइर-ढेइर पंडित हाइर गेलएँ तएँ जानबे काइल ?
• लाल देखि लालच लागल, आधा ढुकल कांदे लागल, पुरा ढुकल हाँसे लागल ?
• आए गुंगु जाए गुंगु पानि के डाराए गुंगु ?

गनित आर गनति ले संबंधि –

• छ’ मुखटा चाइरे बले, बार’ पांउटा आठे चले ?
• छुटु मुटु आनगा पाँचटा चेनगा ?
• छ’ चर’ने आसे चाइर चर’ने बसे, दुइ चर’ने घंसे ?
• तिरिंग रिंगा तिरि सिंगा, फुल बिस्टु पात रांगा

अइन’ जानकहनि –

• बेजाइं चाँड़े गेलक आर नि घुरलक ?
• कारि-कारि चर’इआ कारि घाँस खाए, पाखना उपरे मुंड़ पटके खंधा सुते जाए ?
• ठुठकु बाढि़न हिलेला, जाम पाकल गिरेला ?
• चारका बकड़ा, पुँइछे मचड़ा ?

किछु Panchpargania Riddle

•  अखड़ बने जनम जेकर चारका चाटाइने मरन तेकर – ढीला।
•  अरून बने कारहा चले – कंकइ।
•  अबर सिकड़ी जबर बाझ बार’ बर’नेक पाल्हा पात – हुरलुसी।
•  अरजुन काठी तेले मांजी भाँगे पारों टुटातके लारी – चुइल।
•  आकुड़ बाकुड़ मुँहे नाइ मुड़े आहे दुइ टा आँइख – खाँखड़ा।
•  आघुइं आघुइं बकली, तेकर पेछुंइ च’र, काठ कर कठ’उरा ल’हा कर ठ’र – हारवाहा।
•  आठटा गड़ सल’ टा हाँठु ताहाँ बसे तहरे कर भाटु – माकड़ा।
•  आए गुगुँ जाए गुगुँ पानी के डाराए गुगुँ- जुता।
•  आंड़ा भीतरे संाढ़ा ब’ले – घुँघुर।
•  आत के बार’ बरन जातके एके बरन – पान।
•  आबट गरू दाअब केसे गिरल पएना बिछब केसे – साँप।
•  काठ कर घ’ड़ा ल’हा कर सिंग पीटत के बाजे धातिंग तिंग – ढ’ल।
•  इंचरी के खाअं आर टिंगरी के चलं – खुखड़ी (मुरगा)।
•  उपरे आइग हेंठें अधन – हुका/लमफ’।
•  उपरे फुले भीतरे फ’रे – बादाम।
•  उपरे गुठु भीतरे गुदा – बेइल।
•  ऊपरे हाड़ भीतरे मास – घोंघी।
•  उपरे तुका हेठें आँड़ा – महुआ।
•  एक लेके दुइ फेंके – दतुन।
•  एक खाँची प’टा हाड़े ग’ड़े न’ टा – खाटी।
•  एकटा गाछे तीन टा तिअन, जान नितर दें तीन काठ धान – मुनगा।
•  एक बीताक डानटा हिले आधा घानटा – दतुन।
•  एक बीताक गाढ़ा आइज भरले काइल ढढ़हा – पेट।
•  कन छुआक गटा गात फुसड़ी – कंठर।
•  कान बिना आँइखे सुने, ग’ड़ बिना कुदे पारे – साँप।
•  कारी कारी चर’इआ, कारी घाँस खाए, पाखना उपरे ठंठकी मारे खंचा सुते जाए -खुर।
•  केरिआ लुका धुँध लुका – भांटा (बेइगन)।

किछु Panchpargania Riddle

• कारिआ आहे कुइली निहीं, ग’ल ह’ए ग’ली निहीं, गाए सुन्दर गाउअ’इआ निहीं – टेप रिकार्डर।
•  खेड़हा जेसन कान गुँड़री रकम मुड़ – सारइफर।
•  गुली गुली चर’इआ गुली रकम पेट, काहाँ जाबे रे चर’इआ बाँध ले हेंठ – पानीफल।
•  गुँहदल परे कुदिए उठे – ढ़ेंकी।
•  गाई हुँकरे बाछुर मारे – बन्दुक केर ग’ली।
•  गाछ चलले जाए पात पथरले जाए – पाँज।
•  ग’ड़ निहीं हाथ निहीं चले गाड़ार गुड़ुर, दाँत निहीं मुँह निहीं खाए काटार कुटुर – सील ल’ढ़हा।
•  गाछेक नाम हीरा ताहाँ फरे गुड़ बाइगन जीरा – महुआ।
•  गुरू नाइं चेला नाइ सुधार करे हरेक ठाइं – रबड़।
•  ग’ठात के एक बरन उड़रात के बार’ बरन – आंड़ा आर चेनगा।
•  घांस खाए गबर नाइ – हंसुआ।
•  घर आहे दुरा नाहिं – आंड़ा ।
•  घस घस घसड़ तीन मुड़ गड़ दस – हार गरू हारवाहा।
•  घेंचाएँ फाँसी पुंइछे माटी – लाट डांग।
•  चाइर गरम चाइर नरम चाइर निर झरे, एक हरिनेक बार’ खुर फरक फरक चले – बार’ महिना।
•  च’रे नि पारे च’राए, पानिं नी पारे प’चाए – बिद्दा/बुइद।
•  छटे मटे ड’भा फुल फुटे स’भा – दिआ।
•  छुटु मुटु आनगा पाँचटा चेनगा – हाथ कर आँगुर।
•  जले जनमे सभे खाएन, मंाए छुआ मइर जाएन – नुन।
•  जात के स’झे स’झ घुर’त के बाँक’ ढ़ेंक’ – कुँआ ड’रा।
•  जतना टानेक अतना घटेला का हेके – फीका।
•  छ’ चर’ने आसे, चाइर चर’ने ब’से, दुइ चरने घंसे – माछी।
•  छ’ मुखटा चाइरे ब’ले बार’ पांअ आठे चले – पालकी उभा।
•  झुंड़ तरे मुलुर मुलुर, मुलुर तले पें, पें तरे बदर, बदर जानत रे कन – आँइख नाक आर मुँह
•  ठुठकु बाढि़न हिलेला, जाम पाका गिरेला – भेंड़ारी।
•  ठींग च’रेइ मुड़े मास – भेलआ।
•  डुइब डुइब जाए पुँइछे चारा खाए – सुइ सुता।
•  तिरिगं रींगा तिरि सींगा, फुल बिसटु पात रांगा – पानीफल।
•  दादाएँ देइक एक दिन भउजिंइ ले सभे दिन – सिंदुर।
•  दिने काना राइते देखे – दुँदु।
•  दल’ बाबु हाट जाए बिना दसे माइर खाए – ढ’ल।
•  दस सिर ना लागे राबन, तबे नारीक हाथे तार मरन राँइध बाँइट छटे बड़े करेन भइखन – झींगा।
•  देले ना सिराइक आर लेले ना पूरेइक – मन/गेआन।

किछु Panchpargania Riddle

•  धइर के उतान करी हिल हिल काम करी – लड़ही पाटी।
•  धुमपु धुपुड़ बसतपुर जतिक कुदे ततिक धुर – छाँहेइर।
•  नि गडि़आ चाइर गडि़आ के कुदाए नि मुडि़आ हुलकी पाठाए – बेंग, साँप आर खाँखड़ा।
•  नाथु दादाक छुआ टाके हाथु दादा लेलक एसन सुन्दर छुआ टाके पटकी मराए देलक- सिंघन।
•  नज’रे ना सुझे हाथे ना ध’राए अ’कर बिनु मंतुक बाँचे ना पाराए – हाउआ (हवा)।
•  पात खरखस फर गेड़ा जे नि जाने तेकर बाप भेड़ा – कंहड़ा।
•  पिंधना पिंधे छुआ, लाँगटाएँ दे बुढ़ा – बाँस
•  पुरूब ले आल पुरूबिआ, पुरूबिआ क’हे पुरूबेक बात पाँच लग हार ज’तेन दस लग कारहा – दतुन।
•  फर डुमका गात फ’का फाइड़ खाले बेजाइन म’जा – मादाइल।
•  फुलेक ऊपर दुइ टा पात – दुरूब साग।
•  फुल छटे बड़े गाछ सुँघले ना लागे बास – सीम’इर।
•  बतीस बरदा माड़ाएँ घुरे एक अख’इन उटके – दांत आर जीभ।
•  बिना फुले फरे फर फरल परे पकाए मर बिन पाँइखे आकासे उंडे़ – लाहरा।
•  बिना गेंइठेक गाछ फरे एक बार – केरा/केला
•  बिन आँइखेक जीउ ह’ए लिकुड़पिकुड़ – जं’क।
•  बतीस राजा धान कुटे, एक राजा उटके – दाँत आर जीभ।
•  बेटी सुन्दरी मंाए कंथरी – क’इर।
•  बकरा रहलक बाँधाए ड’रा गेलक च’रे – कंहड़ा।
•  बन ले बाहरालक हांस, हाँस कहे मर सुधाइ मांस – काढ़ानी।
•  बाघ बाघिन हारज’ते कुकुर बुने धान, बनेक बांदर लुंड़ा झाड़े खेडि़आ किसान – दाँत, जीभ, हाथ आर पेट।
•  बछर दिनेक खासी एक कुटिआ मांस – घंघी।
•  बिन पटरींग रेल चले तेकर बेजाइन चाका, केउ रीचिक छुइ देले बने एक चाका – गेंड़ गेड़री पका।
•  बाप बेटाक एके नाम, डुमका छं’ड़ाक भिनु नाम – कंउड़ी।
•  बाढ़ले बीता ना बाढ़ले हांथ – बाढ़ेइन।
•  बन झाड़ पड़ी गेल, लिपि आंड़ा रही गेल – पाखना।
•  बाड़का हाथी पुँइछे लाथी – ढ़ेंकी।

किछु Panchpargania Riddle

•  बाहइरे प’टा भीतरे मांस – बांइध।
•  बाँका मामा नुन ख’जे – तेंतेइर।
•  भरल बाँधे चाँद गरग’राए – पिठा।
•  मरल गाते निकास ले आधमरा के बाँचाए -चपुआ।
•  माझ ब’ने कारहा चले – कंकइ।
•  माझ ब’ने डुभा उबराल – काढ़ानी।
•  माझ बने चँगरी गिरल – ल’हा चिमटी।
•  मरल काटं’ जिअंत राखं’ रकते बाँध’ आइड़, ढ़ेइर ढ़ेइर पंडित हाइर गेलएँ तएँ जानबे काइल – आरता।
•  मामाक छागेइर छुलेइ गागाए – ढ’ल।
•  मुड़ नेखे कान आहे हाथ आहे गड़ नेखे – झुला।
•  माटिक मांदेइर खेइड़काक जुबा, डेइग डेइग नाचे तुमबा – भुंजल मुढ़ी।
•  माएक त’ भेलेंग पेलंेग लाता, बेटीक त स’नाए गढ़ल छाता – केसेइर फुल।
•  रने बने चल’इआ लाल पानी पीअइआ – ढीला।
•  राजा केर बाँइध तेंगर’ले नि तेंगराए – आँड़ा।
•  राजा कर ध’ती नापा ले नि नापाए – डहर।
•  राजा घरेक घड़ी एके बिहाने बुढ़ी – केरा चाहे केला
•  राइते गरू ग’ठाल, बिहाने ग’बर नाइ, कन पथे गरू गेलएँ, ग’हाइले गबर नाइ – तारेआ।
•  रगं काल’ खाते भाल’ – जाम पाकल।
•  रिंग रिंग रिंग ताकर दुइ सिंग, पाइख निहीं पाखुड़ निहीं भुइएँ पारे डिम – घंघी।

किछु Panchpargania Riddle

•  रिंग रिंग रिंग डाइरे छ’ड़ी पाते पारे डिम – बंेबुत।
•  रिहिड़ गिहिड़ झाँटी ताँहा फरल घांटी भगमानेक पेट फुटल सियार लेगलक चंइथ – डिंबुकांटा।
•  लाली गाइ छाली खाए पानी पिले मइर जाए – आइग।
•  लिक लिक डाँड़ी चख चख पात, खातके मधु उलगतके कपास – गुड़डाँग/कातारी।
•  लिकी लिकी डाँड़ी झिकी मिकी साज, खाए ना खँटए देखे कर साध – चउड़ल।
•  से गाछटाक नामहीरा, फरेला ताहाँ गुड़ बाइगन जीरा – महुआ।
•  सइँआ देलक हांथे मएँ झंकलं पाते, का ह’लक का गेलक मांगी त’ देम का पुछि त’ कहम का – पाखन पानी/अ’ला/बरफ
•  सुखल बाँधे बकली हादबादाए – मुड़ही।
•  स’ स’ रूखना स’ स’ बइसला काटले ना काटाएला एसन का बाकला – छाँहेइर।
•  साफा आर सुन्दर आहे, तबे एखन आहे तखन नेखे खाबे त’ खाउआए दुबुं रीचिक’ च’काउ नेखे – बरफ।
•  हाड़ न गड़ गल गल गात – जेंगटी।
•  हुकुड़ कुंबा दुइटा दुआइर – नाक।
•  हामरे दिअ’ बाप बेटा त’हरे दिअ’ बाप बेटा तीन टा पिठा ग’टाइ ग’टा – बाप, बेटा आर नाती।
•  हरदी केर गाब गुब पीतल कर लोटा, जे नी जाने से बाँदर केर बेटा – बेइल पाका।
•  हुटकु उपरे भुटकु नाचे – टांगा।

सारांश

इ रकम मुहाबरा, कहतुक निआरे एकर’ आर’ ढेइर बाँटा ह’ए पारेला इटाएँ कन’ संदेह नेखे । Panchpargania Riddle (जानकहनि) ले ल’गेक बुइद जानेक, रिझ केरक, बुइद बाढ़ाएक, दिमागि कसरत करेक, भासा के चमतकार करेक, भासा के र’चक बनाएक, भाअ के टेढि़आए के कहेक, एमाइन केर तेहें बेब’हार करल जाएला । इटा ले ल’क मानस मेंहेन जिगासा केर भाअ बाढ़ेला । पाँच परगना छेतर’ मेंहेन बुझ’उअल केर बेब’हार एखन’ ल’कमानस केर बुइद तमड़ेक तेहें मउखिक रूपे करल जाएला ।