भासाक तेहें बेआकरन केर दरकार :- जोहार संगी-साथी। कन’ भी भासा के बेस लेखेर बुझेक चाहे जानेक तेहें व्याकरण जानना जरूरी हेके। हिंआ हामरे देखब की पंचपरगनिया भासाक तेहें बेआकरन केर दरकार केसन रूपे दरकारिक जिनिस हेकेे, आर भासा मेंहेन व्याकरण नी रहले का ह’इ। संगे-संगे भासा, ब’ली आर बिभासा माहान का अंतर आहे सेटाकेर’ जानकारी करब।
Table of Contents
भासाक तेहें बेआकरन केर दरकार|Panchpargania Ker Best Veyakaran
बेआकरन (व्याकरण) सब्द’ केर अरथ’
बेयाकरन (व्याकरण) सब्द’ केर अरथ’ ह’एला (व्या=व्याख्याःकरण=करना) बेइखा करना चाहे खेंचा-खेंचा करना। एआनी खेंचा-खेंचा कइरके बेइखा कइरकहन आसल रूप टाके देखाना। हिंआ एकटा चीज जानेक आहे कि बेइखा किबल भासा बेआकरनिक तत्व गिला केर ह’ए एकर साहित चाहे अन्य चीज बस्तु गिला केर नीहिं।
हिंआ बेआकरनिक तत्व केर मतलब भासा मेंहेन पावाइआ भिनु-भिनु तत्व गिला के अनुसासनबध तरीकाए इकर बेइखा, नियम, निमुद (उदाहरण) एमाइन गिला के बुझेक ले आहे। बेआकरन कन’ भासा केर असन सासतरअ हेके, जेकर दाराए कन’ भासा के सुइध-सुइध (निमन रूपे) क’हेक, लिखेक सीखे पारीला।
भासाक तेहें बेआकरन केर दरकार:- एबार सवाल उठ’तेहे जे, का कन’ भासाक बेआकरन जानलेइ उ भासाटा बेस लेखेर क’हे पारप? बिद्वान केर मत आहे कि बेआकरन नी पइढ़ कहनउ ल’क सुइध-सुइध कहे आर लिखे पारेन। ढेइर नामकरा बिद्वान गिलाउ आपन लेखन मेंहेन बेयाकरन जानतकउ इकर कन’ बिसेस बेबहार नी करेनला। इमने आपन मातरिभासा केर लेखन अइभास ले सीखेनला।
भासाक तेहें बेआकरन केर दरकार:- किबल बेआकरन जानलेइ लग नामकरा लेखक चाहे नामकरा बक्ता नी बनेनला। आपन बिचार स’ंत हेके न झुठ हेके इटाक संबंध बेआकरन संगे नेखे। भासा मेंहेन बेआकरन केर भुल ना ह’लउ बिचार केर भुल ह’ए पारे आर सुन’इआ ताकर गलत अरथ’ ले पारे। एसन टाँए भासाक र’चकता टा कम ह’ए जाएला।
क’हेक मतलब हेके कि बेआकरन केर दाराए हामरे किबल कन’ भासा केर बरन्’ बेब’स्था, सब्देक गढ़न, डाँड़ीक गढ़न एमाइन गिलाक निमन (शुद्ध) बेब’हार जाइन कहन आपन बिचार ठीक से राखे पारीला जेटा क’नइ भी बुझे पार’इआ मानुस आसानी ले बुझे पारेला।
भासाक तेहें बेआकरन केर दरकार इ रकम भाभे आहेः-
- कन’इ भी भासा, ‘भासा’ तबे क’हाएला ज’बे कि अकर बेआकरन ना लिखल जाए। भासा केर पहिलुक रूप ब’ली, बिभासा ह’एला आर उके भासा केर दरजा तबे तक नी देल जाएला जबे तक कि उके बेआकरन केर नियम ले बांधल नी जाएला।
- बेआकरन केर दाराए भासा अनुसासित ह’एला आर उकर रूप टाके थीर करेला।
- क’न’इ भी भासा केर बेआकरन र’हले उ भासाटाक अ’जन (पहचान) बाढ़ेला मतलब उ भासाटा बेआपक (समरिध) बइन जाएला आर राजनीतिक, सामाजिक आधार पाएकहन साहितिक भासा बइन जाएला।
- जेसन भाभे संसार मेंहेन क’न’इ भी पाराकिरितिक घटना नियम केर बिरूध नी ह’एला, असने भासा कउ नियम केर बिरूध नी कहल जाएला।
- बेआकरन भासा मेंहेन कसावट आनेला एआनी नियम मेंहेन बाँइध कहन नियमबध क’रेला आर बेब’सथित करेला जेकर दाराय भासा सीखेकटा आसानी ह’एला।
- क’न’इ भी भासा के बेस लेखेर जानेक तेहें अकर बेआकरन केर मदद (सहजोग) लेकेइ ह’एला, ना ह’ले उ भासाटाक बेस लेखेर गेआन नी ह’ए पारेला। एआनी बेआकरन जानले कनइ भी भासा ठीक से आर बेसी बेस भाभे बुझे पारी।
- बेआकरन केर गेआन र’हले बिदेसी भासा आर अइन’ भासाउ सीखेक मेहेन मदद मिलेला।
- बेआकरन भासा केर गढ़न आर अकर सरूप केर जानकारी देला।
- बेआकरन केर दाराय भासा आसल एआनी सुइध हएला।
ब’ली, बिभासा आर भासा मेहेन का त’फाइत आहे
ब’ली-
ब’ली भासा केर एकटा छ’टे रूप हेके। जेटाके ल’ग घर परिबार मेहनेइ बेब’हार करेनला। आर जेकर छेतर’ बेसी धुर तक नाइ रहेला। ब’ली लेक साहित केर रचना नी ह’एला। क’हेक मतलब एकर लिखित रूप नी ह’एला। ब’ली राजनीतिक, सांसकिरितिक आधार पाए कहन आपन छेतर’ के बाढ़ाए पारे आर साहित रचना ह’एकहन उ आपन जाएगा के बदली कहन ब’ली ले बिभासा तक पहुँचे पारेला।
बिभासा-
कन’ ब’ली मेंहेन जखन साहित रचना ह’ए लागेला आर अकर छेतर’ बाइढ़ जाएला तखन उ ब’ली ना रइकहन बिभासा क’हाए लागेला। इटाके उपभासाउ कहल जाएला। इटा ब’ली आर भासाक बीचेक कड़ी हेके।
साधरन रूपे उपभासाके सिस्ट’ भासा मेहेन नी मेसाल जाएला किंतु जखन इकर बेब’हार बहुत बेसी ल’ग क’रे लागेनला आर साहित रचनाउ ह’ए लागेला तखन उ आपन बल पाएकहन भासा मेंहेन इस्थान ब’नाए लेला। हालांकि भासा बइगानिक सउब भासा आर बिभासा मेंहेन कन’ बिसेस अंतर नी माइन आहेन।
भासा-
साहितकार ज’खन कन’ उपभासा के आपन साहित रचना मेंहेन बेसी बेब’हार क’रे लागेला आर एकटा मानक रूप देला चाहे बेआकरनिक नियम ले बाँइध देला तखन उ भासा कहाएला। एहे भासा टाइ आघु चइल कहन ढेइर बेसी ल’ग केर सरब’ माइन भासा ब’इन जाएला।
आर सामाजिक, राजनीतिक, धारमिक आर साहित छेतर’ मेहनउ इ भासा टा माइन पाएला। इ भासा टा बेआकरन केर नियम ले बाँधाल र’हेला आर एकर लिखित रूप थिर ह’एकहन र’हेला।
एहे भासा टाइ बेसी बड़े छेतर’ केर जन समुदाय केर बिचार-बिनिमय केर माइधम ब’नेला एआनी कि इटाक बेब’हार सिक्छा, सासन आर साहित रचना मेहेन ह’ए लागेला।
इ भाभे उपरेक खधि निधिक दांइजे कए एकटा काथा फरिच ह’एला –
- ब’ली केर बिकास बिभासा मेंहेन आर बिभासा केर बिकास भासा मेंहेन।
- बिभासा आर भासा केर बीचे बेआकरन आहे एआनी ज’खन बिभासा के बेआकरन केर नियम मेंहेन बांधल जाएला तखन उ भासा केर रूप ध’इर लेला।
- ब’ली केर कन’ परिस्कार रूप नी ह’एला। जबकि भासा केर परिस्कार रूप ह’एला।
- ब’ली कन’ खास छेतर’ मेंहेन कहल जाएला जबकि भासा ढेइर बड़े छेतर’ माहान कहल जाएला।
- ब’ली केर ढेरी (समूह) केइ भासा कहल जाएला।
बहुत सराहनीय काम रउरे कइर आही गुरुजी