पंचपरगनिया भाषा क्यों है अलग? जानें पंचपरगनिया की प्रमुख भाषागत विशेषताएँ

परिचय

पंचपरगनिया की प्रमुख भाषागत विशेषताएँ: पंचपरगनिया झारखंड केर पाँच परगना छेतर’ मेंहेन कहल जाने वाला एकटा समरिध भासा हेके। इ भासा मेंहेन अनेक जातिगत आर सीमा पार केर भासक मेल-ज’ल देखे पाउआएला। पंचपरगनिया केर आपन धउनि, सबदाउलि, बेआकरन, ल’कगित, कहतुक आर सांसकिरतिक पहचान दसर भासा ले आलेदा ब’नाएला। इ लेख मेंहेन पंचपरगनिया केर परमुख भासागत बिसेसता गिला के बिसतार ले बुझाएक क’सिस करल जाए आहे।

पंचपरगनिया की प्रमुख भाषागत विशेषताएँ केर भितरे हामरे देखब कि पंचपरगनिया भासा टा आर’ अइन’ भासा ले का रकम आलेदा आहे। इ आलेख टाएं किबल पंचपरगनिया भासा केर भासागत बिसेसता केरे चरचा करल जातेहे।

पंचपरगनिया की प्रमुख भाषागत विशेषताएँ (पंचपरगनिया भासा केर परमुख भासागत बिसेसता)

दुनिआ केर हर भासा मेंहेन कन’ न’ कन’ बिसेसता पाउआल जाएला । भासागत बिसेसता केर भितरे असन बिसेसता गिला के राखल जाएला, जेगिला कन’ भासा केर सामाइन’ बिसेसता हएला । इटाएँ धउनिगत, बेआकरनगत बिसेसता ले आलेदा बिसेसता गिला के राखल जाएला ।

1. पंचपरगनिया एक आकार प्रधान भाषा

पंचपरगनिया आकार परधान भासा हेके । इ भासा टाएँ आकार केर लछन बेसि देखाएला । हालाँकि हर भासा मेंहेन आकार केर परधानता आहे किंतु अइन’ भासाक तुलना मेंहेन इ भासा टाएँ आकार आउला सबद’ बेसि देखाएला । जेसन –

सुरू आछर मेंहेन आकार –

आएक, जाभड़, राखा, पागुर, काढ़ानि, बाढ़िन, आड़ास, कामिआ, खामचा, ढामना, खाइट, खापरा, टाँगा, ढाँगा, खाच’ड़ एमाइन ।

मांझेक आछर मेंहेन आकार –

लताल, मनगुमान, गादाल, उचराल, तफाइत, नाभान, खाचड़ाहा, बहाड़, धाराक, चाटाइन, तपाल, हटाइत, चटकाल, उड़िंआल, ढेनाहा, कदाइर एमाइन ।

आखरि आछर मेंहन आकार –

पिठा, चारका, ढड़ा, टंड़रा, खाड़रा, खापरा, पिंढ़ा, लाठा, केरिआ/कारिआ, नुड़ा, माचा, कादा, बाड़ा, खाड़ा एमाइन ।

2. धउनिगत बिसेसता

 हिंदी भासा केर असन सबद’ जेगिला पंचपरगनियाए बेब’हार करल जाएला उगलाकउ आपन धउनितंतर’ केर अनुजाइ आकार देक’हन बेब’हार करल जाएला । जेसन –

3. बिभकति आर परत’ए केर बिसेसता

पंचपरगनिया बाइक रचना मेंहेन कांहु – कांहु बिभ’क्तिक जाएगाएँ परत’ए (प्रत्यय) केर बेब’हार करल जाएला किंतु अरथ’ मेंहेन कन’ अन्तर नि हएला । इ रकम पंचपरगनिया मेंहेन बिभ’क्ति आर परत’ए दुइअ केर बेब’हार देखे पाउआएला । जेसन –

4. उपसरग’ आर परत’ए केर समरिध परंपरा

पंचपरगनिया सब्द’ केर गढ़’ने तिन रकमेक परत’ए (उपसर्ग/प्रत्यय) बेब’हार करल जाएला, जेगिला सुरूएँ मांझे आर आखिरे तिन’ जाएगाएँ करल जाएला । जेसन –

सब्देक सुरूएँ –

अ + काल = अकाल, अ + समइ = असमइ, अ + जान = अजान
अन + ठेकान = अनठेकान, उ + चार = उचार, अउ + गुन = अउगुन,
आप + सुखि + ए = आपसुखिए एमाइन ।

सब्देक मांझे –

दान + अ = दाअन, जल + आ = जआल, छुरि + आ = छुआरि
आड़ + इ = आइड़, जन + ख = जखन, कन + ख = कखन
चिरल + क = चिरकल, भिड़ल + क = भिड़कल, बाला + क = बाकला
रास + क = राकस एमाइन ।

सब्देक आखिरे –

काड़ा + अआर = काड़अआर, बाप + अउति = बापउति
पुरखा + अउति = पुरखउति, माछ + उआ = माछुआ
फाउग + उआ = फागुआ, आंक + उआरि = आंकउआरि
आप + उस = आपुस । एमाइन

5. कहतुक आर खेति संबधि गेआन

पंचपरगनिया भासा मेंहन खेति – किसानि ले पाउआइआ कहतुक एसन आहे जेगिला ढेइर – ढेइर बछर केर अनुभउ ले सिखल आहे, इग्ला एसन आहे कि एखनुक मउसम बिग्आन केउ फेल क’रि । एखनुक मउसम बिग्आन बेसि – ले – बेसि चाइर चाहे पाँच दिन पहिलुक जानकारि देला किंतु पंचपरगनिया भासा मेंहेन पाउआइआ कहतुक (जेगिला बहुत लांबा समइएक अनुभउ ले सिखल गेआन केर भांड़ार हेके) गिलाएँ भबिस’ते हउअ’इआ छ’ महिना पहिलुक जानकारि देला जेसन – ‘‘मकरे बान टिकरे धान’’ कहेक मतलब हेके कि जदि मकर दिन बुंदा – बांदिअ पानि गिरालक त’ किसान बुइझ जाएला कि इ बछर बेस बइरसा गिराइ । एहे रकमे ‘‘पासे मांड़ेइर धुरे पानि, धुरे मांड़ेइर पासे पानि’’ कहेक मतलब चाँद केर पासे मांड़ेइर (बादेइर केर ग’ल) घेराल आहे त’ पानि धुरे आहे इआनि चांड़े पानि गिराएक लछन ना लागे । हुंआइ मांड़ेइर चाँद केर धुरे आहे त’ पानि पासे आहे इआनि एक दुइ दिने पानि गिराएक संभाउना आहे । इ रकम भाभे किसान के खेतिक काम करेक तेहें मदद मिलेला ।

6. पंचपरगनिया भासा केर ढेइर नाम

पंचपरगनिया भासा केर नामकरन ढेइर जातिगत भासाक मिलल रूप केर आधारे ह’ए आहे, मुल रूपे पाँच परगना आर एकर आस पासे बस’बास कर’इआ जाति गिलाक आधारे ।

पंचपरगनिया भासा के ना किबल ‘‘पंचपरगनिया’’ नामे जानल जाएला बल्कि एके अइन’ नामउ जानल जाएला जेसन –

अइन’ नाम

• खेरवारी
• तमड़िआ
• दिकुकाजि
• सदानी
• सदरी
• गँवारी
• टाँइड़बांगला
• टाँइड़राजिआ एमाइन

एकर ढेइर उपभासाउ आहे जेसन –

पंचपरगनिया केर उपभासा

• राहेआरि
• बांड़दिआ
• बुंडूआरि
• तमड़िआ
• ढालभुमिआ
• खरसंउइआ
• मानभुमिआ एमाइन ।

इगला सउब पंचपरगनिया कतना समरिध भासा हेके सेटा के साबुज करेला।

7. पंचपरगनिया केर छेतर’ बिस्तार

पंचपरगनिया मुल रूपे पाँच परगना मेंहेन कहल जाएला किंतु एकर छेतर’ बिस्तार बांगाल, आसाम आर उड़िसा माहनउ आहे ।

8. मिसरित भासा केर रूप मेंहेन पंचपरगनिया

पंचपरगनिया भासा अनेक जातिगत भासा आर बाहिर ले आल भासाकेर मिसरन (खिचड़ि) हेके । जेसन – कुड़मि, मुड़ा, उराँव, हो, खड़िआ अहिर, महलि एमाइन आर भासाक मइधे बांगला, उड़िआ, हिंदी, उर्दू, आर आर’ जेतरा आसे पासेक छेतरिअ भासा । अहे तेहें पंचपरगनिया मेंहेन इग्ला सउब भासा गिलाक सब्दाउलि देखे पाउआएला । एत’ब कार’नेइ एके अइन’ भासाक बिदुआन आपन भासा मेंहेन मिलाएक असफल परेआस क’इर आहंए ।

9. झुमेइर गितेक आर सांसकिरतिक बिसेसता

पंचपरगनिया भासा केर झुमेइर गित हिंआक सउब गित केर पारान हेके । आर हिंआक बाज – बाजना सउब बाजा के त’पेक खेम’ता राखेला । हिंआ केर गित संगित मेंहन सउब ले बेसि राग, ताल, लए आर मातरा माहान गितकाल आर बाजाल जाएला । एतब कार’ने कहल जाए पाराए कि पंचपरगनिया भासा हिंआकेर सउब भासा केर आधार हेके । पंचपरगनिया भासा दसरा सउब भासा के संगे लेके चल’इआ भासा हेके । इ भासा टा दसरा कन’ भासा संग परभाबित नि हएला बल्कि दसरा भासा खुद इकर संग परभाबित हएला । इटा एकटा पंचपरगनिया भासा केर भिनु रकमेक बिसेसता हेके । एकर अलाउआ पंचपरगनिया भासिक नेग निअम, पिंधना अढ़ना, संसकार, खान – पान एमाइन सउब आलेदा आहे जेटा पाँच परगना आर पंचपरगनिया भासा के आलेदा चिन्हाप देला ।

10. पंचपरगनिया केर बिसिस्ट सब्द’

पंचपरगनिया माहान किछु एसन बिसिस्ट सबद’ आहे जे गिला हिंआ केर बिसिसट’ता आर भिनु – भिनु जातिअ भासाक खिंचड़ि रूप के फरिचाएला । जेसन –

आड़ास, आड़ाप, कुरूआ, कचे, केंजे, खांधा, खुदि, गतार, गादर, गेरेगेते, गेंदरा, घेंचा, घुनचा, चुड़ुल, चाड़ु, छेंदा, उंड़ुं, खामचा, हांबु, झांक, छंद’रंद’, जाभड़, झिंका, टुंढ़ु, टाटरा, ठुला, ठाँउ, डिडि, डागर, डाबेइर, डुकार, ढेलका, ढेपसा, ढुप, तुका, तिअन, तेंदड़, थथना, दामड़ा, दाँतिआ, धारना, नुड़ा, नारहाँठा, पुतलि, पंठिआ, पाट, पच’, पाटु, फंफरा, फासुड़, फदल’, बाँका, बांड़ारि, भुलकु, भरि, भाँबरा, मरखु, मेइर, मुंधना, रेंबेत, रिठाल, रूगड़ि, लाता, लुगा, लुधुर, लुबुस, सेरहा, सिप’इत, सेके, हाड़का, हुटुप, हुड़का, हेजेड़, भुलकु, पुचु, खाचड़, भेड़ारि, कुलुप, माकड़ा, चर’इ, पंडकि, आलिन, अरिआना, लेद’, निरजांगड़िआ, देदे – प’इच, जुअँाइट, निघा, हुड़का, फेरकि, टाटरा एमाइन

11. आर्य भासा परिवार मेंहेन पंचपरगनिया केर बिसेस थान

पंचपरगनिया आरज’ भासा परिबार केर भासा हेके। मंतुक इ भासा केर एकटा भिनु रकमेक बिसेसता इटा हेके कि इ भासा मेंहेन अनेक आदिवासी आर जातिगत भासाक मिसरन देखे पाउआएला। जेसन – मुंडारी, कुड़मालि, हो, संथाली, कुड़ूँख, खड़िआ, महलि एमाइन केर सब्द’ आर भासागत लछन पंचपरगनिया माहान पाउआएला।
ताथउ पंचपरगनिया के आर्य भाषा परिवार मेंहेन राखल जाएला। इटाक मुख्य कार’न हेके कि एकर बेआकर’निक बनावट, किरिआ रूप, सब्द’ रचना आर वाक्य संरचना आर्य भासाक संगे बेसि मेल खाएला।
इ रकम कहल जाए पाराए कि पंचपरगनिया एकटा समन्वयकारी भासा हेके, जाहाँ आर्य भासा केर मूल ढाँचा केर संगे-संगे आदिवासी भासाक लसिंद’ (प्रभाव) देखे पाउआएला। एहे मिसिरित सरूप पंचपरगनिया के द’सरा भासा ले अलग आर बिसिस्ट पहचान देला।

सारांश

इ रकम भाभे पंचपरगनिया केर आपन भासागत बिसेसता देखे पाउआएला जेटाक आधारे कहल जाए पाराए कि पंचपरगनिया एकटा नामकरा आर आलेदा (स्वतंत्र) भासा हेके । एकर ध्वनि, व्याकरण, लोकगीत, लोककहावत, शब्दावली आर सांस्कृतिक पहचान एके झारखंड केर समृद्ध लोकभासा केर रूपे स्थापित करेला।

 यह भी पढ़ें:

• पंचपरगनिया संज्ञा
• पंचपरगनिया सर्वनाम
• पंचपरगनिया बिसेसन
• पंचपरगनिया क्रिया
• भासाक तेहें बेआकरन केर दरकार
• पंचपरगनिया व्याकरणिक विशेषताएँ